潘頓與莫雷拉經常都會俾人攞來作比較，講真個人認為兩者騎功在伯仲之間，但有樣嘢可以肯定的是，潘頓在爭取騎師冠軍的路途上明顯比莫雷拉艱辛好多。首先是負磅問題，潘頓最低造磅是119磅，而莫雷拉就可以做到114磅，潘頓就因為唔能夠騎到輕磅馬，所以在賽事中坐騎經常唔滿額，全季總共騎717場，而莫雷拉就有733場。亦係因為騎唔到輕磅馬，令原本屬於潘頓的頭馬，流入了莫雷拉手中，最佳例子就係隻「寶成智勝」，隻馬先在潘頓胯下取得一冠一亞，其後上三班要負118磅，因潘頓造唔到磅而改配莫雷拉並贏馬，之後再出仲贏多兩場，齋計呢隻馬已令到潘頓損失三場頭馬，而莫雷拉就多咗三場頭馬的進帳。潘頓曾經刻意造磅去騎「忠心勇士」，當時孭117磅出戰香港短途錦標，但由於節食關係，體力受到影響，最終僅以頸位之微不敵頭馬「爭分奪秒」只得季軍，好明顯在短兵相接之下鬥落去就冇以往咁得心應手。
另一樣是潘頓沒有像莫雷拉咁，有蔡約翰強大後盾全力支持，剛季莫雷拉跟蔡廄合作贏31場頭馬，成為莫雷拉頭馬主要來源地，而潘頓騎四次蔡廄馬一隻都贏唔到。而提供最多頭馬俾潘頓的馬房是大摩有17場，但大摩與莫雷拉合作都贏8場。莫雷拉上季頭馬遍布21廄，潘頓得18廄，以咁劣勢的情況下，潘頓都贏到冠軍，真係唔到你唔服。