攬炒派區議員「玩政治」叻，鬧街坊更叻。好似北區區議員陳惠達咁，最近就因為一把遮同曾經支持佢嘅街坊發生衝突，仲要用數十句粗口「招呼」對方。尊貴嘅區議員上咗位梗唔使理啲支持者啦，而咁粗鄙嘅行為梗係連最基本嘅EQ都冇，睇嚟撐攬炒派嘅街坊真係要學識帶眼識人喎。
話說陳惠達喺上月底舉行「派發雨傘」服務，聲稱雨傘聚集多功能，包括遮風、擋雨、防曬、做枴杖、擋異物乜都得。不過，事隔一日，佢就喺社交平台fb上大鬧：「有條×婆因為攞唔到把遮，話以後一家四口唔投我，仲話抵『泛民』一個二個比（俾）人拉晒。」
派遮都搞唔掂
咁估唔到，一件小小嘅派遮風波，陳議員都處理唔到，唔單只接受唔到街坊意見，更加用粗口回應：「唔好×投，不過票都唔知仲有無得投。」佢仲揚言自己已經下刪粗口數十句、「忍咗想爆好×耐」。
北區監察議會聯盟就此事批評陳惠達(圖)：「一把遮就可以睇到陳議員情緒處理能力有幾咁高？情緒唔穩定應該要控制下lor（囉），對住自己嘅選民可以咁粗口嘅咩？」揶揄「一家四口投惠達，數十粗口來報答」。
亦有唔少網民都對陳惠達嘅態度表示反感，「Nancy Wong」就話：「原來咁樣係民主，原來比（俾）人批評就要用粗口話返人？」「Shark Lee Chi Pan」就指：「口講民主，畀（俾）人批評就用粗口回應。真小人，偽君子，唔好成日掛在口邊『為香港人』，只為自己利益！」「Wendy Wong」就話：「投錯票，投在這個暴泛民議員身上。」●香港文匯報記者 倪思言