●攬炒派區議員杜嘉倫宣布辭任。N.T.監察聯盟fb截圖宣誓條例立法在即，有啲攬炒派可能心知肚明自己無得留低，於是就以唔同藉口拒絕宣誓。好似元朗區議員杜嘉倫咁，日前就喺社交平台fb以仲審議緊嘅所謂「政府要求區議員宣誓的條文模糊」為由，喺權衡輕重下決定辭職，但其實行得正、企得正又怕咩喎？唔通佢都知道自己其身不正？
曾借出議辦助違法「初選」
作為攬炒派一員嘅杜嘉倫，過去曾經多次被警方拘捕，好似上年6月就因為喺中環參與未經批准嘅遊行，中途更一度走出馬路，最後被控涉嫌參與非法集結及參與未經批准集結。而上年民主派舉行所謂嘅「初選」期間，杜嘉倫亦有借出議員辦事處作為票站，協助違法「初選」進行。「N.T. 監察聯盟」就指出，杜嘉倫喺擔任區議員期間，竟然為咗迎合區內大多數以「港獨」、激進嘅區議員同黑暴，將行為走向激進，凡事以政治利益為目的，放棄咗區內嘅民生事務。
唔少網民知道佢辭職嘅消息，都熱烈「恭喜」佢咁話喎，「Eric wong」就興奮咁講：「恭喜恭喜，快啲走，今日嘅好消息！」「普通用戶」就話：「一路好走，好行夾吾 （唔）送！」「阿邊個邊個」就批評佢：「唔好再呃細路， 唔效忠就唔好撈，唔好堆砌一些無理理由出嚟呃細路。」「jon」就心水清咁講：「靠仇恨及黑暴上位，有份用錦繡的區議員辦公室作為泛暴派的初選埸（場）地，反中亂港，害怕被追究唯有盡早走佬，一個只為掠水的卑劣老曱甴而已。」●香港文匯報記者 倪思言