宣誓定唔宣誓對攬炒派而言係一個幾難處理嘅問題。成日抹黑內地嘅「新民主同盟」噚日就喺facebook專頁發表聲明，稱其黨內14位區議員「大多數傾向宣誓，也尊重因個人原因而不宣誓的意願。」行政會議成員湯家驊就轉發個帖文話：「拒絕或反對宣誓等同對號入座，自認不愛港、不愛國，何需猶豫？」
稱14區員大多數傾向宣誓
「新民主同盟」噚日喺facebook發有關區議員宣誓嘅聲明話：「經過會眾詳細討論，新民主同盟現時14位的區議員大多數傾向宣誓，也尊重因個人原因而不宣誓的意願。......不能將2019年市民的託付拱手相讓予建制派。......在政治紅線下，新民主同盟以無畏精神為香港頂下去。無論如何，新民主同盟會繼續堅守民生無小事、民主要堅持的工作方針，為香港人打拚。」
對於「新民主同盟」扭扭擰擰咁曖昧表態，唔少網民都話班人信唔過。好似「董禮霖」就估：「又宣假誓！」「Kin Pang」都話：「即是話不愛國？」「Daniel MA」就覺得：「無論如何，真銀紙同盟上上下下都係一班戀棧權位，依賴公帑為生的政棍。」「Susana Chan」就覺得：「要審核過去言論和所作所謂（為），不是噏幾句便過關。」●香港文匯報記者 黃書蘭