自願加入3委會卻不出席不負責任 網民譏鄺最叻「神隱」
自從攬炒派區議員借消費黑暴上位後，一直無所作為，反而將區議會搞到泛政治化，更甚者民主黨元朗區議員鄺俊宇最近被踢爆，去年加入嘅3個委員會，全年合共開會16次，結果只出席咗兩次，缺勤達14次，連網民都揶揄：「『神』，果然係存於虛無之中。」「神」就係神，不過最叻就應該係神隱囉。●香港文匯報記者 郭家好
事先聲明，區議會委員會係由區議員自行選擇加入，冇強迫成分，而從責任上嚟講，加入得就要去開會都係一件好正常嘅事吧？但係偏偏有人反其道而行，一次會都唔肯去開，講緊嘅就係鄺俊宇。
查會議記錄 揭遲到加早退
根據元朗區議會委員會區議員由2020年1月1日至12月31日嘅出席記錄，鄺俊宇淨係喺5次交通及運輸委員會會議中出席過兩次，只達應該出席嘅40%。香港文匯報再翻查委員會會議記錄，發現佢出席第一次會議時遲到加早退，上午10時55分先到，但下午12時45分就早退離開，而第二次出席會議時雖然有等到個會議結束先走，但都係上午10時20分先到場，遲到喎。
事實上，根據元朗區議員資料介紹，鄺俊宇唔單止係交通及運輸委員會委員，同時亦係文、藝、康、體、福利、教育及治安委員會委員，地區設施管理委員會委員，呢兩個委會員2020年分別開過6次及5次會議，但鄺俊宇從未出席。由此可見，加埋交通及運輸委員會委會，3個委會員合共開咗16次會，但鄺俊宇淨係出席過兩次，缺勤達14次，缺勤率都可謂係非常高。
「元朗藍本」：出勤紀律欠管理
同時，新聞媒體網站「元朗藍本」亦指出，事件反映區議會內目前區議員出勤紀律欠缺管理，例如「地委會」主席民主黨吳玉英和「文委會」主席「動元十八」方浩軒，就鄺俊宇從未出席有關委員會會議均冇作出任何處理。由此可見，有包庇嘅嫌疑。另外，「N.T. 監察聯盟」亦P圖恥笑鄺俊宇，話「提提大家：鄺俊宇最後上線時間（係）上個月25:25p.m。」
面對「鄺神」神隱，唔少網民都揶揄鄺俊宇見唔到人係「正常」㗎。「梁鵬」揶揄：「『神』，果然係存於虛無之中。」「Wai Kwan Wong」譏諷：「 牠是『神』，正常看不見。」「梁麗珍」批評鄺俊宇白逗人工，「辦事處都不用返啦，人做議員，佢做議員，睇怕無一個好似佢咁嘆，工不用返，工資照袋，就算兄弟企街乞討佢都不用現身，躲藏豪宅，吃喝玩樂？兄弟要加油呀！」「Ga Ga Yg」笑言：「尋『神』記」。「Tom Wong」認為：「（鄺俊宇）在豪宅出住糧諗緊」。