●網民發帖指鄧德鵬夫妻刪除咗自己以前個fb page，並將「十八汽車美容」fb page個名改為「日和工房」。 網上截圖狗狗咁可愛，點會有人捨得虐待狗狗呢？但現實中真係會有人咁無良，之前有一間黃店「十八汽車美容」員工用膠紙將狗狗封嘴，仲辯稱係因為愛犬頑皮，最後咪搞到警方主動調查，登門拘捕。當時，呢位黃店技工師傅鄧德鵬同佢老婆搞到人神共憤，當佢哋過街老鼠咁，以為集體杯葛佢哋就完啦，點知近排有網民發現鄧德鵬喺黃店原址重新開過一間汽車美容店，仲擅自將原店嘅fb page改為新店名，企圖蒙混過關，洗底改名。
話說，之前觀塘一間黃店「十八汽車美容」負責人鄧德鵬喺互聯網上載一張唐狗俾膠紙封嘴、頸纏短鐵鏈綁近門口嘅照片，當中更附帶粗言穢語，令網民質疑有人虐狗，紛紛口誅筆伐，後來狗主知道闖禍，於是嗱嗱臨忙發帖報狗平安及道歉，又辯稱係因為愛犬頑皮先以膠紙暫時封嘴，最後警方主動調查，登門拘捕涉案狗主。
後來，又有網民踢爆應該係有個「家長」課金畀鄧德鵬夫妻開舖，但之後呢對男女就扮晒自己係老闆，實質食晒「家長」啲錢，賺完錢就走人，??家仲喺原址改名開返新舖，名正言順做老闆，簡直係食「家長」夾棍。
近日，有名為「蘇志燮二奶」嘅網民喺「連登」發帖，指鄧德鵬夫妻刪除咗自己以前個fb page，並將「十八汽車美容」fb page個名改為「日和工房」，好似想靠改名洗底，叫網民唔好放過佢哋。
之後，「十八汽車美容」亦另開一個新嘅fb page，並發表聲明話原本嘅fb page喺4月4日俾鄧德鵬盜用，將原先屬於公司嘅fb page專頁擅自更改為佢本人嘅汽車美容公司。咁講法，即係明搶客啦。所以，「十八汽車美容」表明會將呢次事件訴諸法律行動。
網民鬧爆虐狗無賴行為
面對虐狗咁無賴嘅行為，網民都不斷鬧爆佢。「黃之鋒（有口音）」就鬧：「咁×快想洗底？係咪以（為）改個（過）個名就可以扮無事，×街車房佬。」「眼又殘耳又聾」話：「好心唔識養就唔好養，害死隻狗。」「IN石原里美WeLove」怒斥：「我封返你腦細（老闆）個口，等住冇錢開飯，下世做狗啦。」但狗狗得罪你乜嘢，做乜要佢哋做狗影衰晒啲狗。 ●香港文匯報記者 郭家好