立法會《2021年公職（參選及任職）（雜項修訂）條例草案》立法在即，唔少「身有屎」而極度心虛嘅攬炒派區議員驚自己無得留低，於是就以唔同藉口拒絕宣誓。不過，近日發生一場好戲，就係當「人民力量」噚日宣布旗下區議員唔准用「人民力量」身份宣誓後，佢哋唯一一個區議員立即表示要退黨，真係「糧支」大過天，黨紀擺埋一邊。
話說，「人民力量」噚日喺facebook以「『人民力量』反對現任區議員進行『僭建宣誓』」為題發帖，稱2021年4月10日「人民力量」舉行嘅特別會員大會，經出席會員投票，大比數通過「反對『人民力量』區議員，以『人民力量』會員身份進行今次『僭建宣誓』」。
溫子眾發文表示堅定做區員決心
本來以為好威水啦，點知「人民力量」唯一一個黃大仙區議員溫子眾隨即喺facebook發帖表示，佢本人同辦事處同2021「關懷東頭」團隊會尊重「人民力量」特別黨員大會投票結果，但同時正式宣布佢今個月內會擇日退黨。哇，玩到咁大，我估「人民力量」呢一刻一定喺度撕心裂肺緊。之後，溫子眾更繼續發文表示佢堅定做區議員嘅決心，「昂然踏著（着）前路去，追趕理想旅途上，前行步步懷自信，風吹雨打不退讓。」呢鋪實行激死「人民力量」喇。
不過，都有唔少黃絲繼續撐溫子眾，「黃綺婷」話：「『手足』無標籤，一切在心中，『香港人』撐住。」攬炒派沙田區議員許立燊亦留言話：「拍肩」。「林喬偉」就睇穿一切表示：「（因為）要宣誓，（所以）退黨保平安。」成件事真係好好笑呢！不過明嘅，「糧支」始終先係最重要。 ●香港文匯報記者 郭家好