●「離島監察」發帖指「糧支」議員王進洋早前欺負老人家後，又懶得開會再度蟬聯「蛇王洋」。fb圖片繼「鄺神」神隱區議會多個委員會後，噚日又有組織發現攬炒派離島區議員王進洋懶得開會，再度蟬聯「蛇王洋」，因為佢喺合共16次會議中只係出席得8次，剛剛好五成，不愧係「惡懶人協會」會長，連網民都批評佢戲都唔做，「蛇王出糧都做下戲啦，咁嘎（嘅）演戲態度會令班『手足』好難撐喔。」
話說呢位「蛇王洋」，佢之前鬧得最出名嗰單嘢就係去年3月曾公開聲稱會拒絕接受所有支持基本法第二十三條立法市民求助，俾社會各界質疑涉嫌干犯「公職人員行為失當」罪。之後5月又連邪教都要包庇，喺接受訪問時竟公開聲援 「法輪功」，更狂言自己點樣拆走「香港青年關愛協會」反對「法輪功」嘅橫額，真係無良至極。
組織「離島監察」噚日喺facebook發帖，指「糧支」議員王進洋早前欺負老人家後，又懶得開會再度蟬聯「蛇王洋」，果然係「惡懶人協會」會長。
香港文匯報翻查離島區議會委員會區議員由2020年1月1日至12月31日嘅出席記錄，發現王進洋加入嘅社區事務及文化康樂委員會、地區設施管理委員會、交通及運輸委員會及旅遊漁農、環境衞生及氣候變化委員會一共只係出席得8次，但呢幾個會合共有16次會議，所以王進洋先剛剛好得五成出席率，當中環境衞生及氣候變化委員會更係從未出席。
網民：蛇王出糧都做下戲啦
面對咁懶嘅區議員，網民都口不留情，「Win Law」表示：「蛇王出糧都做下戲啦，咁嘎（嘅）演戲態度會令班『手足』好難撐喔。」「Jonathan Chow」質疑：「唔係啊嘛，會都唔開？仲學咩人做議員？難道佢淨係識做暴逃？」「Bo Chung」批評：「垃圾！投咗�嗰啲自己好好返醒（反省）。」「Chan Ka Ming」認為：「依（𠵱）d（啲）敗類......真不知所謂......！」「Steven Chan」覺得：「又為左（咗）糧支」。「Gant Chan」說：「投佢票市民自己攞嚟！」 ●香港文匯報記者 郭家好