咩叫雞咁腳走？睇下近日班區議員一個二個趕住辭職咪知囉。自從特區政府計劃引入區議員宣誓嘅規定，唔少攬炒派區議員都慌失失咁陸續以唔同藉口辭職。北區區議員袁浩倫、同埋上年有份參加民主派違法「初選」而正被還柙嘅荃灣馬灣區議員譚凱邦噚日繼續接力宣布辭職。唔少網民就話，呢啲咪叫攬炒成功咯。
譚凱邦光輝嘅議員生涯最經典嘅一幕，應屬喺區議會會議上叫一哥去試下電槍威力， 不過佢呢啲言論即場被市民KO，市民就反駁呢個撐黑暴嘅人唔去試下啲汽油彈？激到佢發爛渣朝市民怒吼，趕市民出去。
不過呢，噚日譚凱邦就喺facebook宣布辭職，仲要換咗個嘴臉，扮同市民難捨難分。佢話，自還柙以嚟好難接收資訊，加上無辦法直接會見求助的市民，令到佢無辦法接受自己「長期無法親自執行區議員職務的情況」，於是決定辭職。佢仲同班荃灣居民道歉，話自己將來無論喺咩崗位，都可以為環保出一分力咁話。
而袁浩倫就喺facebook發帖，聲稱自己上周五已正式向民政總署遞交辭任信，揚言係因為拒絕宣誓而辭職。
網民譏「咁大個人第一次做對事」
對於佢哋唔撈，唔少網民都「開香檳」慶祝。「Ah JoHn」就話：「佢真係好有心咁做......」「Paul Him」話：「道乜×嘢歉？荃灣人民多謝晒你啦，送×走你條瘟神，荃灣人民準備放煙花慶祝！」「CF Kwan」讚佢哋：「咁大個人，第一次做對事啦！」「Tsui Tsui Tsui」就話：「早走早著（着）」。而「Wai Tang」就懷疑：「辭職肯定身有×過唔到（香港）國安法，費事俾政府DQ仲要賠錢。」「Lam Ling」直言：「環保人仕（士），請講講日本核廢水有乜動作，點解龜縮。」
睇住一個二個攬炒派區議員辭職，有唔少網民都表示羨慕又妒忌當區市民，個個都話希望自己嗰區個區議員都會跟住辭任。 ●香港文匯報記者 倪思言