●周偉雄竟稱「如果有狗隻咬傷人就應該人道毀滅」，即引來廣泛批評。 fb截圖黃絲做嘢有乜共通點？咪就係只講立場囉。話說初生小貓不幸被柴犬咬死本來已經係一幕慘劇，但黃絲諗到嘅解決辦法竟然係毀滅隻狗，呢個時候仲要有攬炒派區議員加多一腳，佢唔單只覺得要人道毀滅咬人嘅柴犬，仲是非顛倒咁「出口術」，話聲稱放朱古力毒狗嘅人其實唔會咁做。
網民「Cat Wong」日前竟喺facebook專頁「天下貓貓一樣貓群組」發帖提議，用放毒嘅方法應對有狗仔四圍咬，之後更稱「路邊已放好味嘅朱古力，歡迎狗主放牧式餵食，已行了5個區（我唔會講去過邊，吹呀？慢慢搵啦，中毒就知㗎啦。）」有網民知道攬炒派葵青區議員周偉雄識得此人，私下問佢睇法，點知周偉雄竟口出狂言：「政府罰則太輕，起唔到阻嚇作用，我覺得所有曾經咬傷人/動物的狗隻應該『人道』毀滅......」
佢無良嘅言論當然立即被人公審，於是佢出帖試圖解畫，但都堅稱「人道」毀滅有理，網民雖然唔肯收貨，但佢竟然繼續喺留言度幫個毒狗嘅朋友搵藉口，話佢雖然咁樣講，但就唔會咁樣做。
唔少網民就留言鬧爆周偉雄黑心。「Aw Priscilla」話：「呢條正×弟，就算係，都係主人錯，狗狗無辜架（㗎）！」「Ruby Tsang」就話：「好奇怪嘅邏輯！如佢所講，我小朋友响（喺）學校打架，佢覺得學校刑罰太低，阻嚇性不大，咁就要捉我小朋友去人道毀滅？養不教，父之過！呢個刑罰係放主人身上，唔係放動物身上，何況有咩權利終止其他動物嘅生命！」
●香港文匯報記者 黃書蘭