每個病人去到醫院都希望可以得到最合適嘅服務及對待，雖然要排隊等見醫生處理病情係常態，不過，醫護要保持良好和專業嘅態度都係常識吧？近日有網民喺「連登」引用媒體報道，指有一位65歲嘅男子接種第二劑科興疫苗幾日後覺得唔舒服去睇醫生，等咗好耐都未輪到佢。呢位男子嘅契仔就幫手問吓女醫護，點知得到嘅一句竟然係：「林鄭政府就係咁㗎啦！」令佢感到好不滿。好多網民都批評呢位女醫護，更形容佢「簡直係醫護之恥！」
消息指，呢位65歲男子姓崔，住喺牛頭角上邨，本身接種第一劑科興疫苗後都無乜唔舒服，身體正正常常，點知日前接種第二劑科興疫苗後，連續幾日都覺得身體唔舒服，於是報警求助，順便通知埋佢契仔。救護員去到崔某屋企幫佢量體溫時，就發現佢已經（發）燒到攝氏38.9度，哇！咁好大件事喎，於是崔某被送到聯合醫院急症室排隊等醫生診治。
見到契爺唔舒服，非常擔心嘅契仔就梗係幫手同當值醫護人員講，佢契爺幾日前接種第二劑科興疫苗，??家又發高燒又腳腫，可唔可以盡快安排診治，但都未能優先。時間就係咁樣慢慢流逝，兩人喺急症室通宵等咗一晚都無人理，於是契仔再次忍唔住問一名女醫護：「幾時輪到我哋？」點知呢位女醫護竟然答佢一句：「林鄭政府就係咁㗎啦！」當堂激到契仔紥紥跳，因為契仔認為，院方職員用呢種態度對待求診病人係絕對唔可以接受，況且佢契爺係接種第二劑新冠疫苗幾日後出現不適，後果可大可小。
更過分嘅係，當契仔心疼契爺，提出要幫契爺轉往私家醫院診治時，當值醫護人員就話無呢項服務，結果成場大龍鳳搞咗12句鐘，佢契爺先睇到醫生。
呢位女醫護咁差嘅服務態度，簡直係俾人感覺因為崔某係接種完科興疫苗覺得唔舒服，所以先特登怠慢佢，一啲都唔專業。
網民狠批醫護之恥
對住呢啲黃醫護，好多網民都表示嬲嬲。「K.c. Leung」認為，女醫護嘅回答好有問題：「係唔係重病都唔可能咁樣答病人呀？」「Don Man」狠批佢係醫護之恥：「你唔滿意政府係你嘅事，但你無克盡己責去幫忙照顧有需要嘅病人更令人覺得齒冷，簡直係醫護之恥！」
「Frances Ko」批評：「黑護好有問題！咩嘢係咁？見人打咗科興（疫苗）就噏一句廢話？」「Ricky Leung」表示：「壞腦醫護人員一個都嫌多，長痛不如短痛，一於炒晒！姑息養奸，只會後患無窮。」
●香港文匯報記者 郭家好