●涉事貓主憶述慘劇。 fb截圖竟質疑「是否隻貓行埋去隻狗度」 黃絲斥黑心老闆等執笠
有初生小貓日前喺灣仔會展舉行嘅寵物節俾柴犬咬死，貓主事後更喺facebook揭發狗主不顧而去，激到唔少網民彈起，齊齊話要將狗主「伏法」。不過，識得個狗主嘅黃店「Pet Pet Express」老闆日前仲喺網上開直播，反屈網民「排山倒海去騷擾」狗主，反過嚟質疑「係隻貓行埋去隻狗度」，叫大家「停火」喎。唔少黃絲睇完直播都鬧爆佢無人性，發起抵制「Pet Pet Express無良店舖」，叫呢個黑心老闆等執笠喎。●香港文匯報記者 黃書蘭
貓主「Gloria C. Leung」日前喺fb發帖話：「貓貓死得好慘，求大家幫忙......今日係（喺）寵物展，我因為反（返）工又要餵奶比（畀）bb（初生小貓），用心口斜咩（揹）袋帶住bb，但有一男一女用兩架寵物車帶住4隻柴犬，有隻柴犬塞個頭入袋咬死左（咗）我隻貓，咬住貓貓黎（嚟）fing（揈），令貓貓頸骨斷左（咗）而死，個主人仲話佢隻狗『不嬲會咬貓』 ，但完全無帶（戴）口罩，發生事（之）後亦不顧而去，希望大家如果有影到狗主或者知道狗主資料，請告知我，我會盡一切努力去追究。」帖文一出，個狗主好快就俾網民起底搵到，喺網上被群起聲討。
狗主否認「不顧而去」
面對群情洶湧，狗主亦有喺�嘅狗隻fb專頁「方吉咬中金多寶」發帖道歉，但就唔認有「不顧而去」，同唔認有講過「我地（哋）隻狗會咬貓」呢句話。「Gloria C. Leung」則發帖話狗主狡辯：「係佢隻狗咬死我隻貓，走左（咗）仲話無走，3點7（3時35分）咬死貓b，4點零幾分走左（咗）話無走。你地（哋）係人唔係？」
不過，認識狗主嘅黃店「Pet Pet Express」老闆卻喺網上開直播叫網民收口。佢咁話：「大家畀少少空間雙方還原件事......若果你排山倒海去騷擾佢（狗主），去問佢點樣發生嘅，我相信一時三刻邊一個人會接受到呢......你自己帶狗帶貓出街係需要評估安全......問題係隻狗主動咬隻貓，係行埋去咬佢吖，定係有其他，（定）係隻貓行埋去隻狗度，呢個已經無從稽考......大家停一停火......如果隻狗真係咁惡，惡得咁犀利，你估我會唔知咩......」
對於「Pet Pet Express」老闆咁講，唔少黃絲都話「難聽過粗口」、「唔再幫襯」。好似「Evan Chu」話：「乜野（嘢）叫做隻貓有冇挑釁要狗去咬佢呢？......點解你會認為由你講既（嘅）野（嘢）或者係用上你既（嘅）個人聲譽既（嘅）說話就等於正確呢？好後悔買過你公司既（嘅）野（嘢）比（畀）我個小朋友用。」「Anita Cws」就話：「條live片講既（嘅）野（嘢）超難聽......係咪無人目睹整個過程，俾人殺死左（咗），生命離去，個殺人犯都無對錯？神邏輯！」「Mon Ning」都話：「我睇完條片嬲到震呀。」
網民譏「寵物血饅好味」
有「手足」就話公義不分黃藍，呼籲抵制。「Leung Chi Wng」話：「抵制『petpetexpress』無良店舖，你我有責，到家陣『petpet老闆』仲幫住狗主，因為狗主好落力幫老闆用佢個人氣ig做宣傳......（公義同黃藍我揀公義行先，唔好意思）」
有網民就話睇清咗「黃店」嘅本性。「Eric Kwok」話：「佢只不過借機會，扮幫動物發聲，呃人錢，幫自己個『b2y label』賣廣告。」「Ryan Wong」就揶揄：「寵物血饅頭好味！」