●黃店「新之烘焙」死不悔改。 fb截圖黃店為咗搵食真係可以連其他黃店同黃絲都呃，利益當前話反面就反面，講緊嘅係喺美孚嘅黃店「新之烘焙」同另一專訪黃店嘅「Yellowland HK 走訪深黃大地」（「Yellowland」）之間嘅恩怨。話說，「新之烘焙」主動要求幫手義賣「Yellowland」嘅曲奇粉，點知就私自抬高價錢嚟賣，更一直走數，用各種藉口唔肯找數畀「Yellowland」，被踢爆後仍然口硬唔認錯，行為方式真係典型黃店。
私自將產品標價提高到129蚊
「Yellowland」日前喺facebook發文，話上年「新之烘焙」主動聯絡佢哋做寄賣，聲稱唔收錢，而最後講好每一罐曲奇粉會象徵式畀10蚊佢，又傾好售價118蚊後就放咗24罐曲奇粉喺度賣。點知有客人同佢哋講，「新之烘焙」私自將產品標價提高到129蚊，仲聲稱會將所有收益捐出，令人覺得好奇怪。
「Yellowland」之後想追返所有賣出嘅曲奇粉數，未賣嘅都收返，唔再寄賣算數。不過，佢哋追咗「新之烘焙」好耐，對方都用各種藉口拖延，好似會話會計未覆到、要求「Yellowland」出收據等等，而「Yellowland」收到數嘅12罐曲奇粉都係得1,290蚊，除返開連本身講嘅108蚊一罐都唔足夠，只有107.5蚊一罐，真係咁少錢都要食。
6罐竟畀另外一啲人攞去賣
成件事更離譜嘅係，當「Yellowland」想收返未賣嘅曲奇粉時，發現只有6罐，另外6罐「新之烘焙」竟然畀咗另外一啲人攞去賣。雖然最後「新之烘焙」還返嗰6罐曲奇粉嘅數畀「Yellowland」，但成件事真係好匪夷所思囉。
事件被揭發後，「新之烘焙」前後兩次發文，稱自己以為對方面談時講好收10%佢先加價到129蚊，又話因為公司要有出入賬，所以一定要入去對方公司戶口，但對方一直都畀唔到個戶口佢，「佢私人户口無出入數無所謂，我地（哋）公司數要有出入帳（賬）的。」
「新之烘焙」又質疑「Yellowland」所謂捐款去「612基金」係咪真嘅，「『yellow land』到底有無俾（畀）『612基金』，幾時俾（畀），俾（畀）幾多，我都跟進唔到啦，相信對方亦無打算交代。」
佢又話如果佢哋要搵錢，就可以學「Yellowland」咁去印個盒，曲奇預拌粉成本大約10蚊，但賣佢100蚊，話30%攞去捐，自己袋60蚊，應該好過幫佢哋義賣喎。
「Winnie Chow」就質疑：「咁你公司賣嘅野（嘢）成本幾多，你又賣幾多呀？你話過左（咗）數人地（哋）話你條數唔岩（啱），咁你過個數目同消失的曲奇數目唔對，你係咪應該先解釋？唔好再delete人留言，真係好樣衰。」「Mandy Lam」表示：「睇完你地（哋）呢篇野（嘢）同對話，我覺得你地（哋）擺到明係呃人錢。」 ●香港文匯報記者 郭家好