●「初見」代「徐記廚房點心」預訂母親節套餐。 fb截圖早前嘅黃店「盆菜風暴」仍然歷歷在目，其間食盡「人血饅頭」嘅「初見」更被瘋狂圍毆。點知，原來「血饅」真係可以食唔停口，事隔都只係得嗰幾個月，臨近母親節「初見」又再撲出嚟，稱幫另一黃店「徐記廚房點心」預訂母親節套餐，但睇真啲個套餐得8樣嘢，前菜仲要唔係人人都接受到嘅涼拌芫荽，結果收成831蚊，明顯掠「831」水啦，唔怪得連黃絲都寸爆佢。
「初見」近日喺facebook發帖，稱臨近母親節，佢哋會「免費」幫黃絲預訂「徐記廚房點心」母親節套餐。呢個套餐預4人至6人食用，預訂價要成831蚊，鬼死咁貴，但認真一睇菜單就唔知好笑定好嬲。佢前菜係涼拌芫荽加茄子青椒皮蛋薈，芫荽呢種食物真係唔係個個都受得落，但之後佢點心方面又有荽荽燒賣同灌湯小籠包，主菜得半隻鹽焗雞、酸菜魚等，再加甜品薑汁糕，就咁收你831蚊，真係好賺到呢。
攬炒派嘅「軍火佬」就睇唔過眼，質疑點解每逢搵到黃絲錢嘅嘢都有「初見」份，稱今次嘅「831」套餐應該差唔多比大排檔賺多一倍，又譏諷入面嘅會唔會好似「初見」上次賣嘅「豪華盆菜」，連魚蛋都當上菜。
好多黃絲都好不滿「初見」又出嚟搵食以及離譜嘅價格，紛紛留言批評。「Wong Cheuk Fung」狠批：「又黎（嚟）料，上次個（嗰）百幾萬（元）咁快洗曬（使晒），今次又想送咩魚蛋燒賣比（畀）人食？」「Day Hui」揶揄：「有無得加上次盆菜嗰款魚旦（蛋）？上次食唔到，今次想訂俾（畀）老×食。」
芫荽當餸 唔知幾多水魚上當
「Otto Cheung」批評：「我應該冇睇錯嘛？芫荽都當味餸？呢次唔知會有幾多水魚上當。」「K Lee Chan」認為：「講真呢個價真心貴，前菜芫荽唔係個個人都岩（啱），雞得半隻明顯唔夠。」「Ryan Lau」道：「831蚊正呀，方死人唔知（人血）饅頭好食到舔舔脷。」「Hon Yi Lee」亦寸道：「不如你地直接賣人血鰻（饅）頭。」「Percy Wong」揶揄：「我會唔會最後比（畀）$831連魚蛋都無得食？」
●香港文匯報記者 郭家好