●胡戩：屢被質疑呃錢、呃光環
喺頒獎禮上講到自己好威水嘅胡戩，喺黃圈其實口碑勁差，更喺高登靠「牛口非」事件「成名」。事源佢喺論壇一人分飾兩角扮非法「佔中」「勇士」，用兩個賬號對話秒回自己post，仲要講嘢前後矛盾、大話連篇、周圍乞錢，被爆從非法「佔中」時就鍾意鬧人哋唔敢「反抗」而自己就坐喺屋企，最終佢自己認衰，但都改變唔到佢成為個論壇嘅過街老鼠，被人鬧佢「得把口」。而佢個啲做嘢方式，同佢今次走佬後卻喺得獎時發表高調言論嘅作派非常吻合。
●亂捧「澳港聯」棄卒博出位
胡戩創辦咗乜「加山傳播」，都展現出為博出位嘅豐富手段。今年2月佢就出咗篇「被國安看漏眼的『危險人物』-莫熾韜：去澳洲選國會議員」嘅訪問，吹捧呢個無人識嘅、澳洲籍嘅莫熾韜（Max）點樣喺澳洲做「香港的代言人」，擺到明出嚟爭食，就被自稱「勇武」嘅同路人鬧爆。
胡戩篇專訪使用嘅手段就係瘋狂吹捧莫熾韜，話佢係「澳港聯前發言人（但被澳港聯割席）」，曾經作為代表出席澳州國會的聽證會，所以也算是鄺頌晴aka娘娘、羅冠聰、張崑陽之輩了」、「Max就是那個香港的代言人。」
該篇訪問仲話，莫熾韜曾獲邀出席過澳洲搞嘅「聽證會」，然後再引用佢話要參選澳洲議員：「聽證會實際上就只係一場大型公關show、政黨角力。」「既然要大費周張（章）一獲國會議員芳心，就不如自己做國會議員。」
篇專訪被胡戩吹成咁，都唔知係唔係為咗自己藉文出位。果然，佢個報道就獲得啲迴響，但就係踩嘅居多。自稱係俾警方追剿嘅黑暴「屠龍小隊」隊長Edward就喺TG發文踢爆篇文根本好多內容同事實不符。唔少「手足」亦都鬧爆胡戩篇文亂封「勇武」。「影×Bot」喺TG群組「饅頭channel」咁話：「《加山傳播》唔好×以為寫個本人立場不代表本台立場我就唔××埋你地（哋）呢班濕×媒體。」
●抄稿改圖就呃課金被鬧爆
胡戩如此上竄下跳事實都係為個錢字。佢去年7月16日先係宣布「加山傳播暫停運作」，更埋下伏筆話「大半年來，《加山傳播》不曾在新聞之下，附註一段要求大家慷慨解囊。然則新聞無價，但付出有價。」
果然，喺10天後嘅7月26日，胡戩就以「『加山傳播』有志未酬」為噱頭，寫低賬戶號碼畀人轉賬，要籌100萬資金。佢又聲稱「而近一星期政權以不同手段『局限』新聞自由時，我們作為較有機會破局的新媒體，在此刻責無旁貸。故連日經內部商討後，我們現決定轉為贊助模式運作，懇求港人贊助。」理由之莫名其妙，黃絲網民都大吃一驚，「ianeson」就話：「唔係話停咩！」「t5unhe113」就質疑：「收山傳播做乜又出山仲一嚟就吸金啊？」「哦噢呀」就話：「一黎（嚟）就開口要1mil, 平時一日出得幾個新聞（仲要係抄新聞改下圖就叫自己係傳媒），好心就收皮啦。」
●馮達浚：播「獨」參加非法初選被捕
「加山傳播」嘅另外一位創辦人馮達浚，係所謂「半島連線」召集人，亦係一個鼓吹香港「獨立」嘅攬炒派中人，早前更因為參與企圖奪取政權嘅非法「初選」被捕，被控串謀顛覆國家政權。
馮達浚曾喺facebook聲言「一想到未能光復香港的惡果，我忽然理解，為何這麼多人不願意放棄」，仲宣稱究竟擁有民主容易，定「香港獨立容易」？對其「港獨」立場，絲毫不加掩飾。
舊年，佢參與立法會九龍西非法「初選」，當時仲喺facebook 發長文稱，要構建所謂「理想國度」，話嚟緊將會有眾多「紀念日」，例如「七一立法會」「7．21」「8．31」等，暗示大家要喺呢啲日子出來「紀念」。
●話不惜一切要攬炒「建國」反中央
馮達浚仲繼續鼓吹「攬炒路線」，要大家記住當初「不惜一切」嘅決心，秉持「香港民族」嘅堅毅，各自「推動抗爭前途」，仲要「不懈地追求我們的理想國度，建構香港共同體」云云。
不過，「初選」結果就不如佢意。參與九龍西初選，馮達浚本來喺電子點票中排名第四，理應可順利「出線」，點知計算紙張票後，俾「民協」何啟明超越咗120票，變咗排第五名。馮達浚之前仲話要跟「N+1」照樣參選，若選舉前嘅民調輸咗先再退，之後俾人鬧爆鎅票後先宣布唔選。
舊年7月16日，即香港國安法生效不久，馮達浚喺fb回顧「初選」結果時稱：「在今次『初選』中，『本土派』乃至『抗爭派』一口氣贏下接近一半的席數，真真正正地『讓本土成為主流』......今日『本土派』及『抗爭派』的大勝，象徵著（着）香港人終於選擇了以香港為本位，力爭香港人自強自立，抗擊『中國殖民暴政』的道路；亦象徵著（着）香港人終於選擇了不惜攬炒、『抗爭』到底、拒不妥協、拒不投降的『抗爭』道路。」暴露其「港獨」分子的本質。 ●香港文匯報記者 鄭治祖