 放大圖片
■趙國雄之子趙朗認為「買樓自住就任何時間都可以入市」。 記者顏倫樂 攝
記者 顏倫樂
樓價高企，年輕人上車無門，最近一篇80後夫妻「慳錢上車」的文章引起城中熱議，作為長實「樓神」趙國雄之子的趙朗，大家可能以為他一定大把物業揸手？錯了！這名「城中筍盤」，原來本身未持有物業，昨日更「公開招親」，揚言結婚後才會買樓，並向傳媒狂呻：「仲喺度儲錢，想等結婚先買，又未有對象，你哋又唔幫我搵。」
積極找女友娶老婆供樓
今年28歲的趙朗，本身掛着「富二代」的頭銜，更兼外表俊朗，卻居然仍未拍拖，可說為港女「福音」。他昨日到永義國際何文田新盤雋瓏記者會「撐場」，其間被記者問到最近一篇80後夫妻「慳錢上車」的文章，他笑指：「27歲上車幾好吖，我而家都每日帶飯返公司食。」不過，小記就唔信，香港女仔會因為趙朗未有樓而唔嫁佢嗎？
趙朗昨日勁呻未有對象，揚言今後要積極找女友：「兩個人一齊儲錢(買樓)先感動㗎嘛。」其後又笑稱：「我仲有首次置業的名額㗎。」他認為，儲到錢就應該要買樓，一定要早買，因為「遲買一定貴」：「儲錢當然辛苦啦，我哋老豆個代，你覺得佢哋唔辛苦咩？個個開頭都要捱，買第一層一定難，但等到樓價上升，換樓就會快啲又容易啲。」
讚長實樓牆夠厚隔音好
趙朗現時任職里昂證券亞太恒富資本(香港)投資董事，事業有成，對於樓市亦有個人看法：「若買樓自住就任何時間都可以入市，因為影響樓價最主要的因素並非息率、加息等，而係通脹，所有國家都印緊銀紙，銀紙只會愈來愈唔值錢，有機會應該要買磚頭(物業)。最緊要量力而為，如果供到樓，有持貨能力就可以入市。」吓，咁似樓神個老闆李超人嘅講法。
所謂賣花讚花香，趙朗昨日亦大讚父親趙國雄負責銷售的長實樓盤：「長實啲樓梗係好啦，啲牆夠厚，隔音好。」樓神父子隔空對話，趙國雄昨出席長實紅磡新盤悅目記者會時，指長實盤「貨靚、價錢公道、地點好」，但兒子有其個人買樓想法，自己亦不會限制他一定買長實盤。
樓神希望阿仔娶中國人
被問到兒子公開招親時，趙國雄嘴角即時上揚，指兒子已經「大個仔」，不會干涉兒子感情生活，但個人就希望將來媳婦是中國人，同性婚姻就仍未能接受：「我個人好開通，但有啲嘢仍未接受到，希望佢帶個女仔返嚟啦。」兒子表示仍未儲夠錢買樓，趙國雄笑說：「佢無問我借呀，但問我借錢就計返多少息咁囉。」
閒話家常之際，趙國雄不忘「樓神」上身，為公司宣傳一下，建議趙朗第一個單位可選擇長實樓盤：「悅目都會推薦下，因為有一按九成，應可以幫到佢。」
|
