伊健與妻入戲院不用喬裝

放大圖片

■伊健獲贈狼人抓。

香港文匯報訊（記者 梁靜儀）鄭伊健昨日以特別嘉賓身份出席戲院開幕儀式，而即將在港上映的超級動作特技鉅製《變種特攻：天啟滅世戰》為開幕精選電影，台上伊健更獲贈全球限量的狼人抓。

問伊健是否經常與太太蒙嘉慧入戲院睇戲？伊健說：「都多，現在興包場睇戲，上網約齊人就包場戲，有啲戲院仲有飯食，不過就未試過包場同老婆兩個睇，覺得好浪費 ，之前錢國偉都試過包場請大家睇戲。」問與太太入戲院睇戲時會否喬裝？他笑說：「唔使，以前就多啲人影，婚後少咗，自由好多，加上我哋通常好早，一係好夜睇。」

同場出席的還有甄詠珊，她前日去醫院探望剛誕下B女的李蘊，她大讚BB靚女：「睇相似爸爸，真人似媽咪，好得意，頭髮好濃密，雙眼皮好深，好靚女。」她又透露李蘊復原得快，已經可以落地行。她謂稍後會帶埋媽媽上去探李蘊，為對方煮雞酒補身。問到媽媽何時為她煮雞酒？甄詠珊笑謂：「自己都想快啲，想生兩個，唔排除會閃婚，希望2018年可以生到BB。」