林 作
如果問《三國》裡面邊個最好打，相信十個人裡面有十一個都會答--人中呂布，飛將呂奉先。
他最為人熟悉的事蹟，相信都莫過於一個打劉備關羽張飛三個都可以全身而退，以及濮陽城六個曹軍將領都戰不倒呂布，堪稱三國最強。但係反面，他的反覆無常同埋殘暴不仁同樣著名，兩次反叛弒父使得他三姓家奴，呂丁董布的名聲不脛而走。所以喺各個《三國》遊戲之中，呂布都係一個武力頂點，但智力以及忠誠都係奇低，一個殘暴的莽夫，呢個亦係我們從《三國演義》中對他的認識。然而，史實中的呂布真係咁？
首先，歷史中的呂布並無認丁原、董卓為義父（甚至三英戰呂布都係假的，以劉關張當時雜兵的身份根本無資格出場），三姓家奴之說根本無稽。然後我哋再睇吓《三國志》裡面對呂布的描述：以驍勇給并州，（丁原）以布為主簿。主簿，係一個文職，工作大概就係一個現代的秘書。要一個武力超群的人做文職，可推想丁原同呂布的關係根本唔親密。除此之外亦可得出呂布並非不通文墨之輩，否則亦當不了該職。其二，主簿係一個大漢的官職，並唔係丁原的私人部隊，換言之他的大老闆係皇帝。所以，當董卓以皇帝（大老闆）的名義要他跳槽，順手殺埋個反董卓的人，老實講亦屬無可厚非。
董卓進京後倒行逆施，大肆殺戮盡失人心。加上呂布當時與董卓婢女私通（貂蟬既原型出自呢度），他驚生性暴躁的董卓得知後會殺咗他。呢個時候王允又帶皇帝大老闆的旨意要他殺董卓，呂布自然順水推舟來招奉詔討賊為民除害。
要論殘暴，呂布喺歷史上未曾如董卓曹操孫權一樣屠城劫掠，在白門樓兵敗之後甚至叫左右殺咗他然後向曹操請功，只係左右不忍他先自綁出城投降。要論不智魯莽，呂布曾經識破袁紹對他的暗殺之計成功逃脫。呂布真係好似羅貫中在《三國演義》之中所描述一樣？我留畀大家自己判斷。
早前，九龍灣強姦案疑犯在警署中自殺身亡。不過，我所見到大部分傳媒都係用淫魔、強姦犯畏罪自盡等的標題去報道，典型的未審先判。喺呢個媒體為銷量而用誇張失實的報道，甚至喺「後真相時代」，只係相信主流媒體的片面之詞？呂布會話你知一支筆真係可以黑轉白寫死人。