林 作
其實我打機真係好差。無計啦，細細個阿媽就唔畀我打機，話會玩物喪志，所以根本無乜機會去接觸呢樣東西。不過到了今時今日，打機......唔係，係電競已經成為一項專業，而且相信規模會愈來愈大。
會有幾大？2022年的杭州亞運已經將電子競技納入正式比賽項目之一。以現今的主流線上電子遊戲英雄聯盟（League of Legends)為例，它的大型比賽直播的觀眾人數是以千萬作為單位的，贊助商無數，冠軍獎金更有過百萬美金。美國、歐洲、中國內地、台灣及韓國等地都看中電競的商機，近年都紛紛大力發展。
不過，好多人仍然對電競抱有負面的意見，認為打機呢啲咁簡單兒戲的活動根本唔應該搬上大舞台。體院主席林大輝認為電競未如其他體育活動需要一定體能，如果電競都可以作為比賽的話，麻雀橋牌等也應該可以。
我對以上的意見當然不甚認同。首先，電競的發展是一股潮流，順勢發展乃是大勢所趨。加上電子遊戲參與人數眾多，單以英雄聯盟為例已經有億萬玩家，超過八成人為25歲以下，單論這個已經贏過麻雀橋牌多多聲。此外，電競賽事一場可能要幾個鐘，所以職業選手訓練時都會鍛煉體能，去保證會有足夠的精神及集中力去應付比賽。他們每日都有固定的訓練以及作息時間，基本上與運動員沒什麼分別。而比賽中，各個隊員要不停溝通及釐定戰術先可以擊敗對手。有啲指令及執行甚至要準確到「斷秒計」，一個失誤可能就會輸了一場比賽。聽到呢度，你仲會覺得電競兒戲？
猶幸政府唔短視，肯帶頭發展電競事業。隨着AR及VR的普及，電子遊戲的發展只會愈來愈快。相對歐美非等地，亞洲人在體能上的確有所不及，所以在主流運動上一直落後。但一直以腦筋靈活見稱的香港人，未嘗唔可以喺電競呢個食腦的項目上大放光芒。