■「熱狗」直指狗主資敵。 fb截圖所謂攻擊就係最好嘅防守，「熱狗（熱血公民）」陣營似乎深明此道。近日，「熱狗」被親「狗主」黃毓民嘅「無敵神駒」仇思達狙擊，指佢哋作大收聽其網台嘅人數，被揶揄為「篤數時報」，噚日佢哋就攞住「神駒」個facebook直播中，「本土民主前線」黃台仰話「狗主」有份幫佢哋搞「Channel I」網台嚟大做文章，將「熱普城」嘅敗選歸咎於「狗主」「兩邊落注」，暗撐「本民前」同「青年新政」，去鎅「城邦派國師」傻根（陳云根）佢哋嘅票喎。有「狗主」信徒反駁話，傻根當時都為梁天琦站過台啦。「神駒」就話「熱狗」明顯想將篤數問題嘅視線轉移去「狗主」身上，「無用的，抹黑別人還不了『熱狗』清白。」 ■香港文匯報記者 甘瑜
「狗達」黃洋達聲稱一開節目就籌到十幾萬蚊、傻根一開節目就收到9萬蚊課金，《熱血時報》嘅網台節目因此被質疑篤數。「熱城」中人鬧爆質疑嘅人唔識科技嘢，但就從來唔交代到底有幾多人收聽節目。佢哋仲轉守為攻，喺網上掀起另一場罵戰。
幫黃台仰開台 買兩邊致敗選
云粉「藍鳳凰」就攞「神駒」嘅fb直播內容話︰「黃台仰琴（噚）晚話：『channel I 係MyRadio幫佢開，係佢哋幫手會（搞）器材同設施比（畀）佢哋先開台，而羊（唔）只係幫佢哋做IT嘅支援。』......咁唔怪得選舉期間，又『兄弟爬山各自努力』又盛，又任佢抹黑啦！當時2015年MyRadio總監Marco幫『本民前』set up（設立）個台，技術設施乜都提供哂（晒）。咁搞法，當日『熱普城』支持者真係俾MyRadio賣到透。真正買兩邊嘅係黃毓民， 如果（『香港民族黨』召集人）陳浩天無DQ到，買三邊都仲得。」
咁啱得咁蹺，「狗主」網台嘅節目總監「Marco Toscanini」噚晚凌晨亦喺fb出帖，話舊年8月27日尖東造勢大會後，自己曾經同「本民前」梁天琦講咗兩句，然後梁天琦喺MR嘅節目就摺咗。
「熱狗」「Edward Ho」仲食住個勢、捉住個point話，當日造勢大會，「狗主」明明大罵「本民前」，「究竟在老人家（『狗主』）身邊侍奉既（嘅）救生員，在選舉期間向黃台仰梁天琦透露左（咗）幾多『熱普城』陣營既（嘅）資訊？當時選舉兩軍對陣打緊仗都有計（偈）傾，資敵的真面目，是否醜陋？」佢又話，當時選舉期間，「狗主」仲繼續畀梁天琦等人喺MR開咪，做法唔合理，「如此搞選舉，敵我不分，焉能不敗？」
傻根質疑資助政敵瓜分票源
「上知天文、下知地理」嘅傻根亦即刻諗明自己點解敗選，出帖話︰「真相大白。真要感謝黃台仰講出真相。『熱普城』可以爭取的議席，各區最多只有一個，卻是買兩邊、三邊，資助政敵去瓜分票源，這是什麼競選玩法？」
之不過，當日「熱普城」陣營宣佈參選立法會，最流行嘅講法係佢哋收割「本民前」嘅「光環」喎，唔好以為人哋唔記得你曾經沾過光先得㗎。唔少網民都指出，2016年時「熱普城」唔少人都撐過「本民前」，「Tony Cheung」就帖出舊年2月20日，傻根「通匪罪證」嘅短片《陳雲發言節錄-「本土民主前線」梁天琦造勢晚會 20160220》，就係當時「本民前」參與立法會新界東補選，傻根有份站台嘅短片啦。
傻根即刻劃清界線話︰「幫梁天琦助選新東補選議席是毓民號令的，我是被動參加，故此我除了出席造勢大會之外（而且也刻意遲到），並無站台助選。我不是傻的。」到底係咪呢？大家自行判斷啦。
