■有網民惡搞狗主吹雞投訴「藍鳳凰」一事。 fb專頁「毓民memes」圖片。曾經話要做「五區公投、全民制憲」嘅「熱普城」，立法會選舉後陷入分裂，「狗主」黃毓民為首嘅「普羅政治學苑」，經常同被揶揄為「熱青城」嘅「熱血公民」及「城邦派」互相清算，但近日終於打到去高層「全面開戰」。事緣狗主早前做節目時講到「有冇劈死啲反骨仔」，「熱青城」嘅「藍鳳凰」就回應咒狗主「冇仔送終」，狗主嬲起上嚟就吹雞叫網民向facebook投訴有關仇恨言論。「熱狗」過氣頭目狗達（黃洋達）個老婆殘獸慧（陳秀慧）再一次代夫出征，cap狗主圖去鬧爆佢，狗主就話︰「哈，終於忍唔住開我名；好得很，那就開戰吧！」令人諗起《海虎》，「要戰，便戰吧！」其實，大家都咁小學雞，不如都係走返埋一堆啦。 ■香港文匯報記者 甘瑜
「熱普城」雖然分裂，但佢哋對大家嘅關心程度有增無減，互相追睇對方嘅網上節目，真係個幾兩個鐘入面講咗一句嘢都逃唔出對方耳目。「藍鳳凰」上周五就喺facebook出文，話狗主喺節目到講︰「喂，噚晚瞓覺打雷打到我醒，我睇下有無劈死啲反骨仔，劈死啲不孝人士。」一字一句咁記低，按網路上嘅分類，真係只可以講︰「係愛啊！」
不過，愛嘅反面就係恨，「藍鳳凰」其後就話︰「那（哪）來的自信，會覺得自己未死，就等於自己係正義一方？個天未整死你，話唔定係特登令你長命啲，等你白頭人送黑頭人，等你冇仔送終呢！你知你個仔做幾多傷身嘢啦！然後白頭人送完黑頭人之後，先黎（嚟）個百病纏身，到時候已經冇人冇物照顧你，最後先收你皮都得㗎∼所以咪咁老定呀！」
篤中死穴 狗主搵fb投訴
「熱青城」中人留意狗主，狗主嘅信眾亦都好留意「熱青城」。「Paco Chong」即刻cap返「藍鳳凰」嘅刻薄言論繼續鬧爆，而俾人鬧中屋企人呢個死穴，狗主即同大家講「仇恨言論，可以向fb投訴」，仲講到明話︰「又搞我屋企人，既然唔敢現真身，咁只有入黃洋達數！」有關呼籲又即刻獲得信眾響應，而「藍鳳凰」亦似乎轉咗另一個fb賬戶出post。
狗主話要入狗達數，眾所周知狗達向來都係藉老婆去反擊，殘獸慧又再一次代夫出征，cap低狗主個留言喺fb話︰「冇咒過你，冇叫過人搞過你，冇得閒理過你，全家比你鬧勻曬（晒），咒勻晒，你屈夠未？」佢仲喺hashtag擺埋啲新仇舊恨落去，包括佢早前封鎖狗主嘅人一事話︰「我連block我覺得做嘢那西亂黎（嚟）既（嘅）人都被人咒」等等。
狗主之後就喺自己fb回應︰「哈哈，終於忍唔住開我名；好得很，那就開戰吧！」並加上「闢邪辨佞」、「儆惡懲奸替天行道」、「黃洋達不是說自己是幫會首領嗎」、「不要做烏龜」嘅hashtag。殘獸慧再反擊道︰「你開咗名好耐啦∼侮辱咗我地好耐啦。老屈咗我地好耐啦。不過我冇興趣開戰，冇嘢要開戰，虛擬戰場我不如打機。冇咒你冇搞你係你同自己過唔去啫。我講事實。」
至於挑起戰端嘅「藍鳳凰」，亦寸寸貢話︰「議員，乜成隻小學雞咁呀？65歲人，十月一日生日就66啦，毫無身為長輩嘅自覺同尊嚴，自曝醜態於公眾。响（響）節目咒人全家俾雷劈犯眾怒之後，居然走去吹雞port網民，打壓言論自由，仲一副洋洋得意嘅衰樣，唔怪得選民離棄你啦！冇咗黃洋達，你只不過係一件死老而不。」
佢仲自high道︰「盲嘅都睇到，就係月費收唔夠，搞到個個月要倒貼，又見陳雲個節目《縱橫漢天下》課金金額高，搞到條氣唔順，於是搵人出氣。」
其實兩邊愈撈愈唔掂，愈鬥愈小學雞，大家都有眼見，咁多共通點，呢鋪打和啦。