「熱狗」平時喺網上對住「狗主」黃毓民同「本民青」喊打喊殺，搬埋人哋全家出嚟咁滯，但當對住一啲樣貌娟好而且無得罪佢哋嘅女仔，態度即刻180度轉變，更何況係《熱血時報》嘅新主持？好似上個月先正式開咪嘅「法子」，就喺facebook惹嚟唔少狂蜂浪蝶，不過有啲「熱狗」嘅留言就非常露骨，話想錫啖人都夠膽死，俾狗主同「本民青」啲支持者寸係咪前世未見過女性。不過，「本民青」班人都係差唔多質地，「青年新政」阿Cheap禎（游蕙禎）前幾日轉咗封面相，就即刻仆到去供奉！
其實「法子」喺今年3月已經開始喺《熱時》個節目《熱血劇場》客串，上個月開始就喺《深宵fool人信箱》做主持，書展期間都幫過手喺《熱時》攤檔叫賣散貨。
fb專頁「香港癲佬力量」最近就收集咗啲「熱狗」喺「法子」fb嘅留言（見圖），嘩有啲簡直係性騷擾，有人就問「法子」可唔可以畀佢錫啖，有人更加離譜到話要「請你食腸」，畀「香癲力」班網民鬧佢哋禽獸、人渣，其中「Albert Ng」就話「班毒×對得禽獸胃（陳秀慧）多，見到個正常少少嘅，褲都除唔×切咁」。
都有人質疑「法子」做人夠「化」先至吸引到咁多「熱狗」，好似「Yang Tat Tsang」就叫佢「除低大眼仔（隱形眼鏡）先講」，「香癲力」個管理員亦都忍唔住話：「班狗公係唔會知道，呢個世界有大眼仔、Mascara（睫毛液）、眉筆、眼線、粉底，呢啲嘢可以令一個平凡女人，呃到人叫佢一聲靚女！」
不過，「本民青」班人都係有口話人無口話自己，好似Cheap禎前排轉咗封面相，都係普普通通側面照一張啫，成班人即刻去佢fb同「女神」請安，又話靚女又話有仙氣。學獎門人話齋，打和啦！ ■香港文匯報記者 陳庭佳