■狗達半夜播蜘蛛，竟然比傻根的節目更受歡迎，連蜘蛛都不如，不知傻根有何感想？ fb截圖《熱血時報》被謔稱為《篤數時報》，已係人所共知，但「熱狗」就一直死撐冇篤數。不過，「熱狗」過氣「首領」狗達（黃洋達）前晚凌晨發個帖，直播一隻蜘蛛，竟然都有6,000幾人睇，如果唔係篤數，就應該係創造咗人類史上嘅收視奇蹟。不過，唔少網民都唔信有奇蹟，認為係「熱狗」篤數唔記得改人數設定，有人仲寸爆留言問︰「凌晨六千幾人睇？個（嗰）隻係蜘蛛俠嚟架（㗎）？」
「熱狗惡報」facebook專頁前日貼出狗達fb嘅截圖，顯示佢凌晨兩點幾三點直播所謂「深宵生態獵奇」，其實就係播一隻蜘蛛，竟然都有6,098人睇。「熱狗惡報」就話︰「作為專業『篤數師』，黃洋達嘅表現一直未如理想，舉個例子：凌晨三四點影隻爛鬼蜘蛛，有乜理由『篤』六千人在線圍觀啫！」一直針對「熱狗」嘅「香港癲佬力量」亦有轉載，仲加上「病態說謊症」嘅標籤。
唔少網民都留言力踩呢個直播人數。「Albert Ng」揶揄︰「凌晨六千幾人睇？個（嗰）隻係蜘蛛俠嚟架（㗎）？」「Patrick Ng」亦話︰「會有6,000人半夜四點去睇你隻死人蜘蛛？咁就叫生態獵奇？ 咁discovery channel係咩呢×你個街？」「梁育輝」直言︰「痴（黐）×綫，膝頭哥都唔信。」
「King Kwok」就因此推算到「熱時」直播「公式」︰「 墊底數......往後任何數字都要減番6,098就岩（啱）喇......除非再改。」
「傻根」觀眾仲少過隻蜘蛛
唔止咁，「熱狗惡報」昨日仲將有6,000幾人深夜睇蜘蛛，同「青城派國師」傻根（陳云根）前晚在《熱時》的節目比較，後者竟然「只有」5,700幾人觀看，並揶揄道：「何以會有此情況呢？有兩個可能，第一：熱狗係喪屍，睇乜都一樣；第二：陳云根、靳民知（節目另一主持、前黃毓民助理）根本同隻蜘蛛冇分別。」「Chan Pok Hin Dennis」補充道：「第三：睇蜘蛛都好過睇陳云根。」
「癲佬力量」也分享了有關帖子，並質疑道：「大佬，篤數都有個譜啦！黃金時段比深宵時段，仲要少咗人睇！？當人白痴嗎？」 ■香港文匯報記者 甘瑜