■親「熱狗」fb專頁將偉哥仰留言截圖，寸佢盟友Cheap禎「又要鬧又要上訴」。 fb截圖法庭判決大家都可以評論，不過有案在身嘅都係講少兩句穩陣啲，唔係就好似「本民青」兩個代表人物偉哥仰（黃台仰）同Cheap禎（游蕙禎）咁起勢俾人寸嘞。13個大前年衝擊立法會嘅示威者，俾律政司覆核刑期，前日改為判監，佢哋一個話司法制度只係幫政權「維穩」，另一個就話刑期可以加到律政司滿意為止，同打爛仔交無分別。有「熱狗」就篤爆Cheap禎喺DQ（取消議員資格）案中上訴到去終審法院，寸佢又要鬧個制度，又要喺制度入面上訴。
偉哥仰本身孭暴動罪
偉哥仰前日喺facebook聲言，邊個再講香港仲有法治，叫人相信司法制度，就係幫政權「維穩」咁話，即刻俾親「熱狗」嘅fb專頁「廢除雙重國籍行動」咬，話佢盟友Cheap禎用緊司法制度上訴，「咁佢（Cheap禎）係×唔係鬼啊？」不過，「熱狗」似乎漏咗一樣嘢，就係偉哥仰本身都孭緊暴動罪，大可以叫佢夠薑喺被判入冊之後就唔好上訴。
至於Cheap禎前日亦都噴吓口水，話原來服完刑可以再覆核刑期，覺得唔夠可以再加碼，加碼到律政司覺得滿足為止，「我哋以為係當（堂）當（堂）正正既（嘅）一場戰爭，到頭來『對家』就話，其實我係嚟打爛仔交，吹咩。」疑似「熱狗」嘅「Thomas To」就話，Cheap禎同「本民青」令到反抗力量失晒民心，令政府打擊佢哋時毋須忌憚，之後仲要再扮委屈，爆粗侮辱Cheap禎謂︰「我×你老母啦社運雞！」 ■香港文匯報記者 陳庭佳