■區諾軒（左圈）早前出席「賣台」台慶，並與黃毓民（右圈）等合照。 網上圖片反對派不同黨派各為私利，所謂「團結」就似星爺《鹿鼎記》電影嗰句「反清復明」一樣，口號嚟嘅啫！「民陣」召集人、民主黨區議員區諾軒，近日就以「團結」為名，出席了「狗主」黃毓民網台「MyRadio」（賣台）的台慶，張合照就四處廣傳，結果就被「人社」等反對派支持者鬧爆佢「通匪」，同對方「和解」即係縱容對方繼續毒害青年繼續分裂「泛民」，唔尊重自己身份，做事唔識得分輕重，如果佢仲有些少羞恥，就應該辭去「民陣」召集人一職喎。 ■香港文匯報記者 羅旦
話說區諾軒當晚去咗「賣台」台慶，仲同狗主，「獨」派嘅沙田區區議員陳國強，搞「光復」嘅梁金成等大合照，而且當晚正係「雙學三丑」被改判監禁，各反對派頭頭都去荔枝角收押所「聲援」之時。結果，「人社」等反對派支持者對此極度不滿。最先發難的是工黨成員郭紹傑，其後各人紛紛加入聲討行列，話區諾軒有結交朋友的自由，但作為「民陣」召集人，「在大事（是）大非的時候，唔去聲援『學民』」，係「垃圾」。
網民鬧「垃圾」 促辭「民陣」要職
「John Lo」稱：「條垃圾身為『民陣』召集人，明知明天遊行，還去鼓吹暴力、族群仇恨的網台晚會做上賓，你唔肯劃清界線，遊行出事誰付（負）責。」
「Sam K Chuen」就稱：「白鴿根本就係×街×家鏟，呢個星期16人判刑嗰兩日加埋兩晚集會聲援全×部失踪，靠佢哋就食屎啦！」「Edmond Lau」則揶揄：「歐（區）生性格係咁，食四方飯：1.堅持留係（喺）民主黨，違反自己所講既（嘅）原則，不能自圓其說；2.經常向『本土派』示好，幻想可擴濶（闊）光譜。」
「Stephen Ho」則回帶道：「上次換屆，同金金（梁金成）拍片商大事，結果......今次一眾『泛民』入獄，立即參與普羅活動，......民陣召集人、民主黨區議員，個人凌駑（駕）一切，唔避忌，真性情！兩個機構要千多萬謝！點可以怪佢！真性情。下次參與熱血活動，陳雲與獸胃（陳秀慧）同歐（區）生同在，好正常，好合理，一定要支持同認同添（𠻹）吖！」
死撐無做錯 寸嘴發晦氣
區諾軒連誠懇地解釋一下都費事，仲寸寸貢地回應質疑，金句包括「我好清楚自己做咩，認同咪認同，唔認同咪算。」「贈你兩個字：慳啲。」「廢話。」「你又知我無去（荔枝角集會）？」
「Eric Chang」批評道：「身為召集人，eq（EQ）之低公關之差令人嘆為觀止。如你認為今日之事比其他事或個人榮辱來得重要，咁咪暫不作回應囉，等過了今日先講。發晦氣地回應比不回應更令事情更差地發展落去。」
由於罵聲不斷，區諾軒不得不拍片解釋，話自己要嘅信念係「同路人」大團結，又話自己係受報販老友邀請去嘅，更spin到話《城市論壇》不同黨派代表都會同場，唔通個個都通匪等等。
不過，網民肯定唔受。「陳伯」就發帖稱：「而（𠵱）家係鬧你『同D（啲）×街一齊飲飲食食』呀，......老老實實，陳國強，梁金金，天河明人，呢三個×街同你關係究竟係乜？朋友定係好朋友？同梁金金，天河明人飲得酒，你唔好話唔當佢地（哋）係朋友呀∼∼」
區諾軒講唔過人，就話俾人狙擊，話人唔理解佢又要拎把刀逼佢跪玻璃喎。「Joe Leung」就稱：「喂阿左膠軒其實係你不斷係（喺）度出post撩是鬥非Ｄ（啲）人先會睇唔過眼出嚟××你。......你先撩者賤無得怪人。」
呢單嘢睇怕有排玩。