■林正軒踢爆蟲泰將自己「最新定位」。 fb截圖接二連三有人因為「港獨」主張而同立法會無緣，自詡識得「扮friend」同當公眾係白癡嘅「熱血公民」主席「蟲泰」鄭松泰，當然亦識得華麗轉身。佢日前接受報章訪問時就稱，自己??家係「修憲派」，再三強調同「港獨」唔同咁話。咁樣劃清界線，連「民陣」副召集人林正軒亦忍唔住喺facebook出文話︰「鄭某同我於2016年在石硤尾宏恩書院辯論時唔係咁講架（㗎）啵。」有網民亦留言寸蟲泰︰「又變成『修憲派』喇？先前d（啲）『勇武派』，『本土派』去晒邊？」
蟲泰近日接受《信報》訪問，講到自己嘅「最新定位」。佢話，自己係「修憲派」，係要保留香港基本法嘅普通法精髓，然後修改當中「漏洞」，唔係「港獨」咁話喎。正常人將「香港建國」或「香港獨立」都視為「獨派」，但佢就爆出天王式金句話︰「一個地方獨立，同一個國家建立，可以係兩樣嘢。」
佢又解釋，自己同鼓吹「港獨」嘅分別，話獨立就係「獨立出去」，但佢哋唔係想「抹殺香港既有優勢」、「冇必要將所有嘢全盤推倒然後重新建立」。咁即係點？
呻窮稱養不起「熱狗」
除咗同「獨派」劃清界線，佢亦都同佢啲「熱狗」窮親戚劃清界線，話自己有議席都做唔到乜嘢，自己官司纏身，供養唔到「熱狗」。佢直認??家做社區嘢都係做啲「唔使點使錢嘅嘢」，例如搞啲親子手作坊、整驅蚊用品等，仲坦白話自己「冇能力做一個前線抗爭者」。
咦？好似同之前主張「勇武」嘅蟲泰爭好遠喎。林正軒亦喺自己fb踢爆︰「鄭某同我於2016年在石硤尾宏恩書院辯論時唔係咁講架（㗎）啵。」並加上「人地（哋）就做左（咗）立法會議員」、「我做左（咗）立法會議員助理」嘅葡萄標籤。
唔少人亦鬧爆蟲泰嘅華麗轉身。「Lui Man Yung」就話︰「又變成『修憲派』喇？先前d（啲）『勇武派』，『本土派』去晒邊？」「Ka Hei Li」即刻補充道︰「佢錄音話自己係扮『本土派』嘛，因為D（啲）公眾以為佢係，所以要同『本土派』扮friend。」「Daniel Chan」亦鄙視道︰「選舉時講另一套。」
「Tony Cheung」就爆seed鬧︰「一時擁抱黃毓民，一時吹捧陳雲。2015年仲喺到（度）講︰我唔同意『城邦論』，只係同意『中港區隔』，（20）16年就無喇喇變左（咗）『城邦永續基本法』。繼續痴（黐）啦『熱狗』，理論基礎？『熱狗』跳樑小丑黎（嚟）架（㗎）炸（咋），識×理論咩，陳云亦云。」
「Wai Kar Kar」嘗試幫蟲泰解圍話︰「共剷（產）黨唔係儍（傻），你只可以扮羊食虎。」「Alex King Chan」就模仿造句反諷︰「共產黨係默許左（咗）『永續基本法』，佢（蟲泰）唔係傻。」
自認無能被譏不如辭職
對於佢霸住議席又自認無能，「Joseph Li」就話︰「甘（咁）講法，你不如辭職啦。」「Jennifer So」就揶揄道︰「有議席後你咪做到反骨仔囉，鄭蟲泰！」「Kei Wong」亦話︰「乜×嘢『修憲派』呀？收皮派就真，做唔到嘢主要係因為你廢，所以下屆咪×再選。」■香港文匯報記者 甘瑜