■傻根一提補選就揚言「自殺式參選」，後面仲發帖話「補選無限fun。城邦有得揀」，要「泛民」死全家喎。 fb截圖選舉管理委員會前日公佈立法會補選將於明年3月舉行，各大黨派均準備打一場選戰。因利益而結合又因利益而分開的「熱普城」，極有可能「重出江湖」，爭埋一份：曾聲稱「退出政壇」的「普羅狗主」（黃毓民）近日在其網台節目中，頻頻「開玩笑」試水溫話：「你真係信我話唔選就唔選呀？」此前實牙實齒話不再參選的「青城派國師」傻根（陳云根），更聲稱要「自殺式」參選。不過，和上屆立法會選舉不同，兩人的支持者都話會狙擊對方，睇怕到時將會七國咁亂。 ■香港文匯報記者 羅旦
狗主在立法會選舉落敗後，由前期狂鬧「本民青政狗」，到後期話原諒對方，一直被指為「有鬼怪」，可能是搵「轉世靈童」之舉。
不過，在選管會宣佈確定將舉行九龍西及新界東地區補選後，狗主就蠢蠢欲動，開始鬧返「本土青政狗」唔係「本土派」，又「戲言」話「你真係信我話唔選就唔選呀」、「點解傳媒唔訪問我點睇補選」等等，唔少人就質疑佢扮講笑，事實係試水溫。
「狗徒」「本民青粉」率先互片
點解要自己上陣，大概係喺選舉時同「本民青政狗」結怨太深，對方唔肯幫佢抬轎。在被「本民青政狗」控制的「連登討論區」，「?田孝高」就話：「早兩個星期又話同本民青一筆勾銷，依（𠵱）家又想同『青政』爭位，本民青梁天琦唔騷佢發脾氣？」
「HKVDC_2017」就狠批狗主「同馮檢基一樣，過氣廢老，死都要係（喺）度獻世......2016年選舉，選舉途中佢背後插梁天琦一刀，呢啖氣我忍到今時今日都未有掟（碇）出！」
他續稱，「我一定落去××黃毓民D（啲）街站......我真係忍左（咗）黃毓民好××耐，終於有機會掃佢場，你知唔知我等得好辛苦？」
疑似狗主fan「品味咖啡」反駁：「×你好心就收下聲啦，梁天琦家下（吓）×到好似過街老鼠咁......睇返轉頭，黃毓民同佢割席係一件好正確既（嘅）事，條友由頭到尾都係政棍，又話乜野（嘢）時代革命，又話『當獨裁成為事實嘅時候，革命就係我哋嘅義務』，講就好聽，轉過頭就用自己光環入哈佛！」
「比利海靈頓」反駁：「黃毓民本身係一個大政棍係不折不扣嘅事實。連梁天琦而（𠵱）家已經成為半隻過街老鼠，咁佢遵守承諾收山我無野（嘢）講啦，但係你班狗徒仲係喺度搬佢個名吹奏，反佢嘅人就係五毛，究竟無唔無恥啲？」支持「熱城」的「三國人物」，例如「劉禪」等都話明會喺選舉期間狙擊狗主。
國師「炸泛民全家」 被寸未食藥
心動嘅唔止係狗主，傻根似乎都心思思，但佢明明話過唔再選，咁點兜好？傻根就喺fb接連發帖：「明年三月，有得玩補選啦。一區只有一席，自殺式參選......」「補選無限fun。城邦有得揀，泛民×家鏟。城邦未必贏，泛民一定輸。報仇雪恨在此時。」話係「自殺式」，即係想話自己唔想贏，但一旦贏咗冇人信佢會唔做囉！
佢嘅支持者就將之理解為狙擊傳統反對派嘅行動，「Hon Wai Chui」稱：「城邦派出選難勝算不大，但可以在公開場合和論壇羞辱泛民和建制，順道宣傳2047問題，要他們在屈辱中當選。」「Ryan CT Lee」則稱：「血海深仇，梗係要下達全面狙殺令，泛民左膠殺無赦。」
傻根其後聽聞狗主都有意出嚟選，就即刻發帖話：「『港獨』老人（狗主）參選的話，城邦一定有人界（鎅）票、追擊。『港獨』老人一於幫後生仔抬轎啦，自己不要參選了。」
不過，好多狗主fan就恥笑傻根。「李絲絲」揶揄：「支持老師再出選，創低票落選新低點。」
「Imon Roc」則說：「食咗藥未？不要諱疾忌醫。」
選舉未到，鍵盤戰已打得咁熱鬧，睇嚟明年3月嘅補選將會相當精彩呢，請大家買定花生期貨！