■傻根日前喺fb出帖大談「補選大計」。 fb截圖「城邦派國師」傻根（陳云根）喺上年立法會選舉輸到仆直，本來都話從此喺政壇上消失定唔知乜嘢，不過近日就姣婆守唔到寡，話喺下年3月舉行嘅補選，「城邦本土」會積極考慮全數參選，叫選民唔使「含淚」投傳統反對派喎。不過，有「離教者」就大潑冷水，寸傻根無贏面，叫佢快啲喺網絡幻覺抽返身出嚟，最起碼拉票嗰陣塊面對住市民先！
傻根日前又夜媽媽喺facebook出帖，先話補選嗰3區入面已經有兩區唔使「含淚投票」，因為「城邦本土」積極考慮參選，之後仲留言「加碼」話積極考慮3區都選晒，可以令市民唔使「被迫選『泛民』，投票給賣港賊殺自己」，「我們要逐步改變香港的宿命，儘管我們被各種勢力無情打擊，因為只有我們才是代表『本土香港人』的尊嚴和利益。我們要形成自己的投票慣性，來打破『民主黨派』的投票慣性。」
佢仲寸傳統反對派一邊鬧內地，一邊報名做港區全國人大代表選舉會議成員，係「小罵大幫忙」咁喎。不過，佢無講到佢本尊係咪去馬。
講到咁，成班「云粉」仲唔谷上腦咩？好似「Oishi Yelu」就叫傻根要記住上年俾「本民青」發到圍呢個仇，更加有人建議，如果「狗主」黃毓民參加九龍西補選，「城邦派」要派人同佢撞區，火藥味好濃喎！
不過，前「熱普城」支持者、最終俾人清算出嚟嘅「陳大文」就唔係咁諗，佢寸傻根似乎忘記咗「現實參選和網絡幻覺的區別」，又笑佢「話音風格特殊」，講嘢時鍾意垂低頭、壓住喉嚨，全無中氣，又唔會望鏡頭同啲人，基本上無人能夠知道佢想講乜，質疑佢點喺論壇同街上妥善表達政見。
「皇天擊殺」對手自動當選
「陳大文」又話，今次補選應該係年輕選民主導，經過去年一役，傻根參選完全無贏面，「即使日日吹喇叭抹黑黃毓民又『港獨』又『泛民』又收美國佬錢收外星人錢都無用，陳雲不會有勝算。」
「Mui Choi 」就仲應棍：「『國師』仲想贏？『皇天擊殺』晒其他參選人，自動當選就得！」 ■香港文匯報記者 鄭治祖