■狗達在fb轉載香港《文匯報》報道。 fb截圖謝「皇上」！我哋噚日報道完「熱狗」喉舌《熱血時報》5周年台慶得200友去之後，「熱狗」過氣「首領」狗達（黃洋達）即刻轉載我哋篇報道，認真唔話得。不過，啲評價就真係此言差矣啦，又話篇報道數臭佢哋、「酸」（妒忌）佢哋，邊有啫。啲觀眾用十零架小巴或幾架大巴就車得晒，何「酸」之有？頂盡都係笑吓�哋啫！佢又多謝班「熱狗」幫佢出返啖氣，俾人質疑佢當自己大晒、「朕即天下」！
狗達噚日喺facebook轉載我哋篇報道（仲要係報紙版），話《熱時》台慶完咗3日自己都未寫感言，最高興就係見到「敵人着急」喎，「小小一個網台台慶，（香港）《文匯報》搞到要出大半版嚟數臭我哋、酸我哋，熱鬧呀。」佢又多謝成班手足嘅努力，令《熱時》再「企高一級」，敵人「酸度」都急升幾級，「有好多感謝說話想同大家講，但最想講係呢一句：多謝你哋幫我出返啖氣！」
網民嘲拜神無燒豬
同「熱狗」打對台嘅「無敵神駒」仇思達，就好關注狗達嘅健康情況，叫佢「打少陣飛機」，「全世界都俾你『熱狗』清算，左中右都想睇你兩公婆仆×㗎啦......人哋恥笑你個濕×『台慶』，就唔係酸你，你兩公婆刻薄寡恩孤寒度縮算死草，有×人酸你咩！」神駒仲支持狗達搞出年年宵，等「熱狗」蝕到入肉！
狗達身為大編劇、大作家，篇感言寫成咁，真係曳啲喎。「Gary A Lau」寸佢 ：「度咗3日，最終就係呢啲咁×低水平打飛機×吹」；「Albert Ng」就提到佢哋台慶前拜神連燒豬都無隻，邊度值得「酸」喎；「Allan Chan」 就覺得狗達字裡行間顯得佢將自己睇到最重要，「班所謂手足唔係幫個台出返啖氣，而只係幫佢黃洋達自己。」
年宵一向係各黨派宣傳同搲銀嘅熱門場合，花生友就叫「熱狗」一定要落場，唔玩正契弟喎，即係想佢哋蝕到空虛啫。「Leo Poon」就話，如果狗達覺得搞場台慶會令敵人「酸度」急升，「熱狗」喺年宵最少要擺兩檔，「一來可再企高兩級，二來敵人酸度也急升N級，唔好唔做呀。你的嘍囉開心，正直公義的人也開心，大眾都開心，恭喜恭喜。」 ■香港文匯報記者 陳庭佳
