出年3月立法會補選，九龍西呢區始終都係最多花生食。最近就有傳「青症」等「本土派」變陣，唔要「佔中牧師」袁天佑個仔袁健恩，改為邀請退出咗白鴿黨（民主黨）嘅南區區議員區諾軒跨區出戰。而區諾軒都認咗有人同佢接洽，但自己係咪去馬要視乎係咪「合乎大義」，足以終結九西亂局喎。不過，網上花生友覺得以佢嘅能力都係得啖笑，仲寸佢離巢都係為咗議席。
之前有傳被DQ（取消議員資格）嘅「青症雙邪」Cheap禎（游蕙禎），同袁健恩斟過問佢去唔去馬，袁健恩亦都肯去諗吓，佢大名亦都出現喺負責協調反對派嘅「民主動力」個「初選」草擬備忘錄度，但最近就傳出區諾軒想跨區去九西試吓，搞到反對派喺九西嘅人選多到瀉。
噚日有網媒報道話，由於公眾對袁健恩嘅反響未如理想，「本土派」就轉為同區諾軒斟斟，邀請佢代袁健恩披甲，提高「出線」機會。區諾軒都認咗上星期開始有人摟佢選，但唔只「本土派」，亦都有「進步民主派」，而之前佢諗都無諗過會選。佢又話會問自己參選係咪「合乎大義」，足以終結九西亂局，如果唔係多佢一個亦都無意義。
網民嘲「製造混亂者」
講就好聽，但到底係咪做就驚青，真係要睇佢去馬先知，但網民就即刻潑佢冷水嘞。「Ar Po」話以佢能力，「只不過係一個笑話」；「黃活志」就質疑佢係「終結者」定係「製造混亂者」；「衛銘琛」更加唔知佢原本過咗底去「本土派」，「佢肯定唔係毛范（毛孟靜同范國威）嗰個『本土』吖， 即係過咗去『熱普城青』系列嗰個『偽勇武本土』？」
「Daniel Li」就玩直線抽擊，狠批區諾軒離巢為位不忠不義、賣黨求榮，「仲可以去到幾絕呢？」 ■香港文匯報記者 陳庭佳
