■何韻詩唔去集會，原來只係為演唱會做準備。 fb截圖反對派為阻撓立法會通過修改議事規則堵塞拉布漏洞，在審議期間連日吹雞要支持者到立法會集會，但反應冷淡，即令到前日表決期間亦不過300人到場。反對派未有檢討自己連年拉布已不得人心，反而四處找替罪羔羊，有人就學足「港獨」分子話唔出來支持佢哋嘅香港人就係「港豬」，有人就問點解激進「本土派」唔出嚟幫手。
有人睇唔過眼，狠批傳統反對派自己對集會都反應冷淡，搵食嘅搵食，行山嘅行山，拉票嘅拉票，好心自己檢討吓喎。
傳統反對派此前吹雞話要「通宵包圍立法會」，但支持者寥寥，結果變成在立法會門外集會，計埋反對派議員同助理、同黨中人及一大班老人家，最高峰時都係只得300人鬆啲，真係笑死街坊。
當然，佢哋唔會檢討點解得咁少人支持，拒絕承認拉布不得人心，修改議事規則係順應民意之舉。連檢討策略都費事，一開聲就賴天賴地，成副怨婦口吻咁話香港人抵死，寧願做奴隸都唔願出嚟撐�哋咁話。
一批傳統反對派更賴到無嘢好賴，就話班「港獨」分子點解唔出嚟，其中香港電台節目《頭條新聞》電視節目主持及D100主持吳志森就係人辦。佢哋嘅謬論，就連一直備受恥笑嘅「熱狗前首領」黃洋達都即刻可以KO佢：「你搞錯對象了，這個時候，你們『民主派』的責任，是『動員人民』，而不是動員『本土派』。」
佢揶揄道：「你地（哋）好好地（哋）宣傳，講清楚你地（哋）抗爭緊D（啲）乜，講得通就有人支持，......抗爭的力量來自人民，你要面對嘅係香港人，唔係去求建制派否決，唔係去求『本土派』出兵，更唔係對住謝偉俊亂嗌性騷擾。」
贏就割席 輸就孭鑊
其實，成班「港獨」分子失盡人心，搞咗幾次大龍鳳，自己吹雞都係得幾百人，就算出晒嚟又點吖，唔通傳統反對派諗住煽佢哋衝，然後自己攞彩？成班「港獨」分子當然冷嘲熱諷啦。網民「Chu Wing」就寸道：「個運動贏果（嗰）下（吓）就『本土派』攪（搞）事搶成果，個運動輸就『本土派』去左（咗）邊！」
「On Kangus」說：「你老人家（吳志森）老人癡（痴）呆到忘記左（咗）當天『本土派』民選出黎（嚟）個（嗰）兩個（『青政雙邪』游蕙禎及梁頌恆）比（俾）人DQ、比（俾）人告到坐監果時，你個節目剝花生笑得幾開心，又冷嘲熱諷得幾大聲呀！」
傳統反對派在旺角暴亂以至「雙邪」瀆誓事件中，又幫佢哋發聲，甚至做人盾幫「雙邪」衝入會議廳，結果都係俾人當係「幫過我嘅契弟」，又真係自己攞嚟。「Max Hui」就揶揄傳統反對派自己「癡心錯付」，仲有咩好講：「勇武『本土派』就要搵『本民前』，『青年新政』，『東九龍社區關注組』，一大班港孩港大幫授權架（㗎）！」
自己友行山練歌各有各「忙」
有「獨派」就話，根本係傳統反對派自己唔掂。「墳場新聞」嘅「青永屍」就連環發帖，力數一直支持傳統反對派嘅《立場新聞》老闆蔡東豪掛住去咗行山，「跑步同反修改議事規則之間，Tony（蔡東豪洋名）從一而終揀左（咗）跑。」歌手何韻詩就為演唱會做準備；D100老闆鄭經瀚就去咗為「瀆誓四丑」、話有意參加明年立法會九龍西補嘅姚松炎拉票。
「佔中三丑」戴耀廷呢，去咗一次集會後就冇咗影，民主黨前主席劉慧卿則掛住fb上載佢食咗咩。網民「Kevin Kwan」就一語中的：「我一直都諗：丫，投票俾（畀）你班『泛民』既（嘅）人，去晒邊呢？返屋企睇塘（溏）心風暴？五十個投你『泛民』既（嘅），有一個會行出去，都夠做啦！」 ■香港文匯報記者 羅旦