■陳方安生忽然撐唔識嘅周庭，轉軚之快令人嘖嘖稱奇。 fb截圖所謂「為利益而結合」，「民主阿婆」、前政務司司長陳方安生此前話唔識周庭係邊個，但佢最近喺周庭嘅選舉宣傳單張中講幾句話撐周庭參選，咁到底佢係之前有失憶症，定係之後有，先令到佢五時花六時變？有網民就突破盲腸，話陳方安生同埋李柱銘，加埋壹傳媒集團嘅吹捧，好明顯係「禍港四人幫」幕後操控，整多個傀儡畀佢哋舞啦！
冇狙擊「香港眾志」一排嘅「無敵神駒」仇思達近日終於發帖，佢上載咗周庭選舉宣傳單張中，仲圈住其中陳方安生話「我們需要一位對『一國兩制，港人治港』有承擔，擁抱民主、自由、法治的年輕人進入議會，捍衛香港的核心價值」一段。
神駒繼而引述新聞報道指陳方安生在上月19日出席傳媒茶敘，被問到會否支持周庭時回應稱「我唔太認識呢位女士」：「十成按揭民主阿婆又話唔識周庭，點解走去老點市民亂撐？係咪『肥佬黎（壹傳媒創辦人黎智英）吹雞，陳老太跪低』？」
「狗主」黃毓民的支持者錢偉洛就道：「一睇又係四大天王（陳日君、李柱銘、陳方安生及黎智英），好明顯後面咩人操盤，周庭入到議會會點樣，你懂的。」
「Fong Sitefong」也指：「查實係生果老闆（黎智英）撐邊個，D（啲）人咪歸邊lo（囉），老闆都要向大大金主證明自己仍有影响（響）力，D（啲）水咪繼續泵。大家都係搵食啫，點會咁認真幫香港推動民主自由。」
網民批李柱銘盲撐噁心
「Milk Tea」就狠批同一單張內李柱銘撐周庭嗰段說話：「 民主老坑（李柱銘）果（嗰）段嘢真係好噁心，『對民主充滿熱誠同堅持。』你同人講一個當初話抵唔住壓力，所以龜縮左（咗）一輪㗎（嘅）人，你讚佢有堅持，我都唔知當民主老坑係失憶定矇×左（咗）！」 ■香港文匯報記者 羅旦