■黃成智 fb圖片反對派班人真係幾惡㗎，自己心儀嘅人選，就算犯咗法都唔畀DQ，但一啲自己睇唔順眼嘅人，就算開句聲話參選都俾佢哋狂鬧。曾任立法會議員嘅黃成智，噚日宣佈以獨立候選人身份參加立法會新界東補選，希望多個中間路線畀市民選擇，仲講到明自己係最後一次參選。不過，消息一出，反對派陣營班人即刻鬧佢係「鬼」係鎅票，仲大鬧佢政棍，話冇人會支持佢。既然係咁，佢哋使乜驚到狂鬧人呢？
以「最大勇氣」最後一次參選
黃成智噚日開記招，以「選擇理性的勇氣」為口號，宣佈自己參加新東補選，佢話希望憑自己嘅勇氣，將多元理性、追求民主嘅聲音帶出嚟，守護香港核心價值喎。佢話，今次係佢最後一次參選，亦都係佢人生「最大的勇氣」。
話晒都係反對派出身，黃成智曾經都係民主黨成員之一，但今日一話參選，即刻俾班反對派支持者冷嘲熱諷、鬧到反艇。「Drew Yip」就話︰「最憎中間路線，想左右逢源但其實兩頭蛇，左右不是人。此等乃政棍之極致。」「Leo Tse」狠批︰「你話唔係鬼，我真唔信。」「Philip Chan」亦陰謀論道︰「他目的是鎅民主派的票。」
啲嘲諷說話仲難聽。「Wai Leung Cheng」譏諷︰「新東馮檢基收啦！」「Matthew Cheng」亦話︰「唔信鏡，都信泡尿吖！」「Erich Tuen」就燒埋民主黨嗰疊話︰「前黨友范國威當選後而（𠵱）家又彈出個黃成智。唔通民主黨嘅DNA係千辛萬苦自自私私都要做議員，同民協大佬互相輝映？」
「Bernard Chan」揶揄︰「撐！爭取第三度敗選。」黃成智竟然有回應喎︰「我只想香港的政治光譜更寬廣，聲音更多元。」算啦，反對派向來話乜就乜，你話唔係鎅票都冇用㗎啦。
新界東參選人目前仲有民建聯同工聯會嘅鄧家彪、「新民主同盟」范國威、獨立無黨派嘅陳玉娥同冇填政治聯繫嘅陳國強。 ■香港文匯報記者 甘瑜