反對派嘅所謂「初選」選完又想推翻結果，又攻擊又威脅下，原本係Plan B嘅民協老馮（馮檢基）前日只好宣佈退出唔玩，噚日接受電台訪問時更爆料話有「進步民主派」反對佢做Plan B，仲話如果老馮出選，一定會有人出選去同佢爭咁話。心水清嘅網民即刻諗起連日出聲想迫走老馮嘅「自決派」朱凱廸，面對俾人鬧自己卑鄙無恥，朱凱廸即刻出聲明話要澄清「不實指控」，話自己一直支持遞補機制，結果又引嚟一批網民留言「回帶」，強力證明根本就係佢三番四次開聲迫人走。另外，朱凱廸嘅聲明仲爆咗其實早於上星期三，「民主派幾位代表」同姚松炎已經諗緊由邊個做Plan D，一早就諗定Plan B同Plan C都走人。你話冇陰謀喎，真係好難信囉。
Plan C也隨時變「玩袁」
老馮俾反對派班人單單打打咗幾日、黯然退場之後，噚日上電台講返始末。佢喺唔同電台節目都講到，有「進步民主派」反對「初選」嘅Plan B遞補機制、有啲「重要人物」覺得個機制可變，仲有人同佢講「你出我一定出」，為免最終釀成反對派兩個候選人對一個建制派候選人嘅情況，佢就退出唔玩，希望平息風波咁話。
而個波就傳咗去民主黨Plan C袁（袁海文）度，但同時亦有傳反對派「大台」其實想另外搵人參選，老馮就叫Plan C袁唔好因此退選，如果唔係就違反「初選」精神喎。Plan C袁唔知係咪驚落得老馮嘅下場，噚日就話自己仲考慮緊利弊。
「民主動力」創會召集人鄭宇碩就聲稱，「民動」冇打算改變機制，而因為老馮係退出，遞補機制冇講清楚點樣處理，所以今日會開會討論。他又話，非常感謝馮檢基及民協咁樣做，「深信」佢係為咗團結喎。至於係咪Plan C袁頂上，佢就話自己理解係咁，但反問如果袁和民主黨「有意見」又應該點做，再打埋開口牌話相信Plan C袁都希望自己得到各黨各派支持。
咁樣講法，係咪即係Plan C袁都隨時變「玩袁」呢？朱凱廸噚日個澄清聲明就提供咗幾條線索︰一就係「民主派幾位代表和姚松炎」上星期三已開會，話要另外搵個Plan D，如果姚松炎被DQ，Plan B、Plan C都唔坃，就要由佢補上，大家都有咗共識；二就係反對派入面對遞補機制真係有分歧；三就係佢真係有份「商討」㗎。
網民不齒朱凱廸「失憶」
連日狠批反對派反口嘅教協總幹事馮家強隨即出文質疑朱凱廸個聲明，「為何要突然討論Plan B和Plan C都不出選的Plan D？是不是預見有任何突發事件令Plan B和Plan C都會一齊退出？」佢又質疑，件事關朱凱廸咩事，而佢聲明內容又點解同之前報道唔同呢？
民主黨嘅黎敬瑋亦喺馮家強篇文留言話︰「所以就好努力逼退馮，下個到袁，然後就可以叫Plan D出場，一定係，除非唔係。」
咁網民點睇朱凱廸嘅聲明呢？「Michael Tsui」忍唔住話︰「講多錯多就係呢種。」「Jim Lei」指出︰「馮檢基有使錢選，有認認真真做準備，現在說不做備選，不是被逼退是什麼？欲蓋彌彰......」
對於朱凱廸喺個聲明度失咗憶咁話自己一直支持遞補機制，唔少網民就留言「回帶」，指出佢啱啱個星期日先話「認為此事不能只有『跟機制』一個行事標準，亦要同時考慮勝算，及維持初選投票市民的士氣。在『初選』投票的市民，很多就是不希望馮檢基成為民主派代表......」所以話，你又信唔信朱凱廸篇「澄清」啦？■香港文匯報記者 甘瑜
網民閙爆朱凱廸
迫走馮檢基 又要人幫圓謊
Fiona Ng︰正×街，擺明迫走馮檢基。
小冼︰唔想分化的話「初選」完左（咗）仲追擊馮做乜？
Kenneth Kent︰有此地無銀feel（感覺），人地（哋）又冇講邊個，你做乜突然自己彈出黎（嚟）？
Joseph Li︰成個「泛民」+「自决（決）界」都知道係迪仔搞哩（呢）鑊野（嘢）出黎（嚟），但迪仔就要求基哥幫佢向市民講大話，話唔關迪仔事。迪仔，你係咪人黎（嚟）架（㗎）？
Peter Wong︰朱凱廸真係惡過狗！ 逼人幫佢圓謊？
朱凱廸支持者繼續踩老馮
Fai Ho︰「你出，我一定出」係老馮一面之詞，如果佢唔講係邊個，只係潑汚（污）水抹黑。佢退出Plan B，放棄捍衛民主派「初選」機制，選咗吨J議會都係一樣會喺關鍵時刻做逃兵。
黎建華︰朱凱廸都踩基哥，民協真系（係）垃圾黨，執（執）左（咗）佢啦！
Sunny Wong︰我覺得大把人雖然支持「初選」，但唔等於佢地（哋）支持plan B或plan C， 就算姚松炎被DQ，都唔會選馮檢基，原因係馮檢基過去表現的確令人失望。
Sandy Yk Lau︰絕對信任朱凱廸，真香港人心清眼亮，要團結，大家加油！
資料來源︰facebook留言
整理︰香港文匯報記者 甘瑜