特區終審法院講明，日後再判有關牽涉暴力嘅非法集會案件，就可以判即時監禁，但總有人唔理三七廿一繼續煽動，講緊嘅就係「佔中三丑」之一嘅戴妖（戴耀廷）。戴妖前晚凌晨就喺facebook稱，抗爭者「不用假設法院必然站在你的一方」， 仲煽動年輕人只要「深信是公義的，就勇敢去做」。就連反對派中人都揶揄，份判詞有乜影響，戴妖呢班「泛民」又點會同你講？有人更直言「日後基本上已係咩都唔做得」，班幕後黑手隨時輕判，留返啲後生受靶咁話。
戴妖喺fb篇文提到，喺「威權」之下，「抗爭成本必會越來越大，不用驚奇」，但點大法，有咩後果，當然就閣下自理，唔好旨意佢講畀你聽。佢仲話︰「只要不放棄，我們一定會成功。」至於成功定義係咩，又真係得佢先知啦！
反對派都有人睇唔過眼
你有你咁睇，好多反對派中人其實都唔認同。中文大學講師劉正管理嘅fb專頁《無神論者的巴別塔》凌晨亦出文指，今次「雙學三丑」嘅判刑，確立咗黃之鋒班人嘅衝擊「涉及暴力」，日後再有咁嘅情況，上訴庭嘅判處監禁判決就係量刑參考，如果牽涉更大成分暴力，判刑就會更重，坦言：「即係只要你怕坐監，日後基本上已係咩都唔做得。」
佢仲話，「佔領」幕後黑手隨時冇事，結果都係年輕人受靶︰「如果用呢個標準，『佔中三恥』同一堆飯（泛）民大台老屎忽，隨時全部輕判，想為香港犧牲嘅資格都無，結果受靶嘅，又係比（俾）佢地（哋）話係鬼嘅『本土派』後生。」
fb專頁《百彈齋主》亦批評班反對派議員就從來唔同網民解決今次判決有咩影響，令成班支持者「全唔知發生乜事」，「唔怪得做『泛民』議員咁輕鬆......連咁大件事，都唔洗（使）解釋，係得班民間人士講同研究，律師？議員？嘿。」不過算啦，反對派班都唔係第一日推班年輕人去行先死先啦！
■香港文匯報記者 甘瑜