「嘭、嘭、嘭！」開槍的一刻，廣林苑不少街坊均能清楚聽到3下巨響，不少街坊更一度以為有人墮樓，事發時已起床準備出門上班的黎先生初時亦如是想。
黎先生坦言，自己其後細心一想：「唔會有3個人跳樓啩。」其間，他聽見有人大聲催促：「快啲搵人幫手，快啲！」始驚覺應是槍聲。未幾即見多輛衝鋒車及大批警員在樓下，氣氛緊張。
另一名男街坊稱，昨日凌晨看電視足球賽事期間，已聽到兩母子不停爭執的聲音，其後突有一名男子大叫：「呢度係私人地方嚟㗎，你想點呀？」未幾即驚聞3下槍聲，他形容「好突然，個心都離一離，好驚......」其後又再傳來一名男子的聲音大叫：「放我走呀。」事後看新聞才知道有警員被搶槍及開槍，所幸無人因此中槍死亡。
居住開槍現場鄰座興林閣的一名姓黃男住客亦表示：「聽到3下槍聲，肯定係槍聲，『嘭、嘭、嘭』連續嘅。跟住有個女人嗌：『快啲報警，你做咩開槍？你係咪癡×線㗎。』」有人則叫：「㩒低佢（疑犯），好×痛。」後來知道是警員中槍。■香港文匯報記者 蕭景源