■林子健在fb抽戴耀廷水，不過對方無覆佢。fb截圖記者跟蹤採訪公眾人物都係業界慣例，但戴耀廷俾記者跟一跟，就即刻腦補咗大量劇情，話懷疑自己「受到強力部門的監控」，仲覺得係有人偷佢手機、電腦資料先知佢去邊喎。佢仲腦洞大開，講到自己好似會俾人「夾返大陸」咁。講到咁科幻，邊個最有共鳴？咪就係之前話自己喺旺角鬧市俾人擄走虐打，但全世界都覺得佢疑點重重，最後仲因為咁而被控「虛報有人犯罪」嘅民主黨釘書健（林子健）囉。釘書健仲同戴耀廷講︰「小心外出被襲，然後『屈』你自編自導。懇請以小弟事件為借鑒！」但戴耀廷就當然冇覆呢個政壇炸彈啦。
戴頭盔話可能諗太多
戴耀廷前晚喺facebook出文，話懷疑自己被「監控」。佢聲稱，自己出門之後明明睇清楚附近冇可能有記者嘅車，點知結果都係俾人影到，所以推論有人「截讀」佢電腦或者手機嘅通訊，知道佢要去邊咁話喎。雖然只係佢腦補嘅情節，但戴耀廷就話「已真實感到受到威脅」，仲聲明自己唔會一個人或同人去內地或澳門，如果有咁嘅情況，一定係受到壓力或威脅喎。
講到咁，點解又唔報警呢？戴耀廷就斷言報警冇用，講到最後又戴返頭盔，話自己可能係「過於敏感」、睇漏記者架車，可能一切只係誤會啦。真係講到「公我贏、字你輸」。
不過，反對派都間唔中散佈下恐慌，希望去嚇到人哋信自己嗰套㗎啦，唔少反對派支持者都受㗎，仲叫佢小心啲𠻹，就好似當時釘書健都係咁啫。搞笑嘅係，釘書健又真係去咗留言喎，仲順便幫自己「伸冤」𠻹，「小心外出被襲，然後『屈』你自編自導。懇請以小弟事件為借鑒！」而因為被控報假案𠵱家仲審緊嘅妠N順便鬧埋警方︰「政治事件，報警只是自取滅亡！（我是人辦，信不信由你？！）」
不過戴耀廷就冇覆釘書健囉。乜咁無義氣㗎，明明你哋兩個思路咁似。網民「Billy Bong」就留言揶揄：「好快又有釘書機釘事件，知道你會自己偷偷（暗中偷渡）在『中國大陸』或澳門出現。你預早聲明，目的只是為了日後foul play作準備！」「Agnes Chan」也寸道：「記住用釘書機釘自己雙腳先好開記招。」
網民等睇「釘書機」翻版
「Tommy Chan」就道：「其實狗仔隊既（嘅）厲害所有人都知道，好多公眾人物，藝人成日都被人影到相，這是新聞採訪自由許可既（嘅）行為。但戴先生以『我有理由懷疑我已受到強力部門的監控』為標題。那就是將新聞採訪自由和強力部門監控聯想在一起，......如果不是，請不要發文用香港市民輿論來打壓記者跟縱（蹤）既（嘅）新聞自由，那是民主社會既（嘅）倒退！」■香港文匯報記者 甘瑜