■《新報人》報道「民陣」霸「大台」鬧劇。 fb截圖「佔中三丑」之一嘅戴耀廷因為鼓吹「港獨」備受社會各界狠批，反對派為咗撐吤[上要宣傳選舉，前晚搞集會話要「捍衛言論自由」，結果咪就係過唔到人都過唔到自己囉。當晚多名「獨派」學生會中人投訴「民陣」唔畀佢哋上台發言，批評「大台」話尊重言論自由其實得把口，最後都係「狗改不了吃屎」喎！唔少人就看透世事咁話，你估「泛民」真係捍衛言論自由咩，都係借議題為未來嘅選舉造勢啫。
稱行政程序拒批發言
據浸會大學傳理學院新聞系學生刊物《新報人》前晚報道，中大學生會會長區倬僖喺「香港民族陣線」嘅集會上話，有「民陣」職員拒絕畀佢哋上「大台」發言，原因係大會「只容許學聯代表發言，而不容許學生代表發言」。
樹仁大學學生會外務副會長暨學聯常委張朗軒亦話，佢哋大前日同「民陣」「接洽」時，大會容許佢上台發言，但前晚突然拒絕，佢對「民陣」嘅決定感到詫異，其後仲喺fb發帖講返始末。
張朗軒話，佢哋通過學聯表示，樹仁學生會、中大學生會想發言，「民陣」都話冇問題，「但到現場後，我們表示想發言，『民陣』表示只接受學聯代表發言。即使我身為學聯常委，想以學生會或學界身份發言，（但）『民陣』表示不能夠接受。」
佢又爆當時對方係咁講嘅：「『如果個個都話學生會想發言咁咪好大獲（鑊）？』......當我地（哋）不分派別去支持言論自由，點解想上台發言都可以話『行政上問題』唔允許，我不能夠接受有人要強加我係學聯代表而唔係代表學生會或者學界。就是次『民陣』的態度與處理手段，我只能夠表示遺憾並強烈譴責。」
唔少網民就留言批評「大台」文化。學聯代表會署理主席張倩盈其後留言「晒冧」，話佢傳訊息畀「民陣」fb專頁，問佢哋有無「學界」發言時間，「睇怕當時誤會咗我想代表學聯發言」，所以就唔畀張朗軒以學界身份上台。不過，張倩盈都忍唔住呻句：「但講真，學生會成員去到，我又有電話聯絡，當臨時換個發言人有幾難......行政問題......」
「獨門」呻屈狗咬狗骨
「獨」人之一、中大學生會代表會民選代表袁德智亦話：「發個言都係十分鐘姐（啫）。行政程序只喺（係）藉口，如果有心，就算加多個人應該點會唔俾（畀）你講兩句，『民陣』真喺（係）有趣。大台真喺（係）不了，以後『民陣』搞咩你都係咁先啦！」「James Wong」則留言揶揄：「到今日咁嘅時局，『民陣』如果都冇呢個sense（觸覺）分清學界、學聯都真係個笑話嚟。」
有出席集會嘅「無待堂堂主」盧斯達也批評「民陣真係狗改不了吃屎」、「你以為言論自由是香港人的公因數，但『泛民』的公因數只有選舉」。盧斯達仲指出，當晚長毛（梁國雄）講講吓就話要令「中共」知道唔係冇代價，下一步要全速開始「風雲計劃」，搞區選喎，「笑×死。」
回應偏幫「泛民」出晒面
「民陣」自己就發聲明話，佢哋只係收到學聯嘅要求，亦留咗時間畀學聯，最終唔畀學生會上台發言，都係「民陣」代表同「泛民」議員助理「轉告」，「以學聯代表名義，而非個別院校學生會名義發言，較能為合辦的各個方面，包括民主派會議各議員所『接受』。」
咁即係有傳統反對派議員唔畀「獨派」學生會上台講嘢啦，言論自由喎。「獨派」組織「學生動源」、「香港民族陣線」噚日都出咗聲明鬧「民陣」損害言論自由。
因「港獨」言論而起嘅集會，最後唔畀「獨派」講嘢，最後得返班關注出年區議會選舉、後年立法會選舉嘅人發言，成件事都幾典型吓。你以為「大台」唔知「港獨」瀨嘢、真係想畀你哋講「港獨」咩？你班學生哥咁都唔明？ ■香港文匯報記者 陳川