口裡說不，身體卻很誠實。戴耀廷策劃違法「佔中」，撕裂社會，但佢就繼續美其名為「愛與和平」。佢近日仲喺fb發帖，話要尊重政見不同以至當權者。話講得非常漂亮，但就有網民揶揄：「俾你地（哋）『泛民』稱之為『港豬』嘅普通人，佢地（哋）幾時受你地（哋）『泛民』尊重？」
戴耀廷在fb以《尊重》為題發帖，話在「抗爭」中，「因抗爭者希望能改變不公義的制度，對那些當權者、既得利益者、或受僱守護現有體制的人......不單不會尊重他們，甚至把他們妖魔化，因他們不只不符公義標準，更是施行不義者。但若抗爭者能用本質的尊重去看他們，即使在公義之路上大家是站在對立兩方，他們仍應受尊重，因他們同是享有人類尊嚴的人。」
網民批強「佔」民意促道歉
「Terry Yue」就留言KO：「佔香港人口約四分之一嘅『泛民』，自以為佔據道德高地，自以為手握真理，自以為有高人一等嘅價值觀，以一種居高臨下嘅心態，將自己嘅主張強加俾（畀）其他四分之三嘅香港人，開口閉口『我地（哋）香港人點點......』，似乎（當）其它（他）四分之三香港人根本不存在。」
他續說：「而這四分之三嘅香港人之中，除部分建制支持者外，大部分衹（只）係對政治冇乜感覺，想安穩過日，想經濟好，想社會唔好太動蕩（盪），俾你地（哋）『泛民』稱之為『港豬』嘅普通人，佢地（哋）幾時受你地（哋）『泛民』尊重？」
「Terry Yue」續道：「如果你真係實踐你所講，尊重政見不同嘅人，你係唔係唔應該鼓吹『違法達義』，號召『佔中』，粗暴咁踐踏法制，社會秩序？因為損害法制同埋社會秩序必然損害好多無辜人嘅利益。如果你真係實踐你所講，『佔中』過後咁多年，你係唔係應該對果（嗰）啲係（喺）『佔中』期間無辜受損嘅大衆講聲對唔住？如果你真係實踐你所講，係唔係應該帶領『泛民』同其它（他）不同政見嘅人一齊坐低，調和不同政見，傾出一個幫香港走出困境嘅方案？」
「Timmy Meier」也道：「若要人尊重你，你必自重。但看不到你有，那你又有何資格受到尊重？連你自己所作出（的）承若（諾），『佔中』後自首去了那（哪）裡？看看現在那班之前給你利用的一班青年人，現在可有人出來撐你？你心照啦，副教授！」
唔少網民都係心水清者，寫幾隻字就想漂白，真係應該節省啲。 ■香港文匯報記者 陳川