話要捍衛言論自由，最後俾人踢爆唔准「獨派」學生上台講嘢，咁樣衰要點解圍？「民陣」就將問題變成「集體責任」，拉埋「民主派會議各議員」入嚟，話咁樣先係大家「接受」嘅安排，有人就諗到要搵人祭旗，話係疑似「佔中糾察」郭紹傑唔畀學生發言喎，郭紹傑隨即留言話「唔好屈我」，自嘲自己喺「大台」下都係小薯一名，「一日最衰都係郭紹傑？所有嘢都係郭紹傑搞成？大家唔好咁抬舉我啦！」
爆單咁嘅醜聞，反對派又唔知點落台啦，網民「Cheung Chi Fung Johnny」就學晒戴耀廷啲「誤會」、「可能」，留言話︰「就我今晚現場所見，中大嶺大學生原本同『民陣』相關人士有交待，係被容許上台，但我見到係疑似Siu Kit Alex Kwok（郭紹傑）意（圖）阻止學生進場發言，少數把持『民陣』的人自作主張，咪又搞到大家互相止（指）責吧！」
咁樣一講，咪由「大台」問題變做一男子問題囉，好多人都跟口就鬧爆郭紹傑「×街」。
不過，郭紹傑就留言反駁，叫大家唔好屈佢，仲批評啲人未搞清楚事實根據，就亂咁指責人，「根本冇邏輯可言」。 ■香港文匯報記者 陳川