激進「本土派」的為害，不僅僅是煽動暴力、鼓吹「港獨」，還包括通過網絡以不同身份散播仇恨以至各種「陰謀論」。近日，「關愛基金」公佈擴展子宮頸癌疫苗注射計劃，親「熱城」的「La Belle Epoque」老闆娘吳斯翹（Billie Ng），就在其經營的家長專頁中危言聳聽稱打疫苗有好大副作用，「日本好多案例，啲女仔一打就癱喎。」一批「科學L」留言反駁，質疑佢嘅邏輯「同『凡係飲過水既人（嘅）都會死』有咩分別」。佢就惡言相向，侮辱不同意者話佢哋「九 歲叫人打喔！你班人渣想嫖雛妓嗎」。有科學L嘆道：「除咗無知同涼薄，仲可以點形容佢哋？」
子宮頸癌在本港女性致命癌症中排第九位。儘管年輕時即開始性生活，或有較多的性伴侶的女性有較高機率患上子宮頸癌，但醫學上至今未能夠確定子宮頸癌的成因，有許多沒有過早或過多性生活的婦女，也可能感染人體乳突淋瘤病毒（HPV），發展成前期癌或癌細胞。而HPV疫苗的功效，對從未感染HPV的女性最為顯著，故HPV疫苗最適合仍未開始性行為的女性。
受醫生質疑 即發難喪鬧
就在關愛基金宣佈擴展子宮頸癌疫苗注射計劃，Billie Ng就喺自己經營嘅fb專頁「磨菇媽媽育兒手冊」發帖，話「日本好多案例，啲女仔一打就癱喎。澳洲仲痴（黐）線，連男仔都叫打，然後，癱埋。得喇得喇，總有人話，幾萬個先有一個癱，最緊要work！哦。咁你仔女打多幾支，我畀埋我個quota你。」
本來佢嘅仔女打唔打係佢自由，但佢專登喺呢個表面上係「親子專頁」出地球post，就可能會對佢嘅支持者造成影響。唔少科普界中人同醫生睇到都抵唔住頸，留言質疑（見表）。
見到自己講嘅俾人反駁，Billie Ng即時發難，話人哋個page啲like唔夠佢多，話人哋喺應刷存在感喎。
「Lbbunny Chan」就反駁：「一個page有幾多like唔係咁重要，重點係like n follow嗰啲係咩人。既然樓主認為自己page多人like多人睇，咁就已經有責任去講一啲唔好咁以偏概全既（嘅）野（嘢），好多人唔會太消化到外界既（嘅）資訊，睇左（咗）就會信㗎啦。」
辱不同意者「人渣想嫖雛妓」
Billie Ng唔夠人拗，就寸嘴話「咁自己寫多啲做宣傳咪有人睇囉，又懶個（過）×」，然後就口賤地攻擊批評佢嘅人：「佢哋啲子女可能個個都好需要，你唔需要唔好話人，真是家家有本難念的經......九歲叫人打喔！你班人渣想嫖雛妓嗎」。「青城派國師」傻根（陳云根）也加一句：「正是。故此低下層的女童可以免費打。」
一直力推科普嘅香港大學理學院助理講師余海峯就忍唔住出口：「大家睇清楚呢位『磨菇媽媽』講嘅嘢喇，佢意思係小朋友冇性行為就唔駛（使）打預防針，所以佢即係accuse緊世上所有不幸患病嘅小朋友都係雛妓。除咗無知同涼薄，仲可以點形容佢哋？」
生物化學系畢業的中學圖書館主任方潤也發帖揶揄，「『30歲性行為咪29歲先打囉！9歲打即係話佢知10歲做都得啦！』 #某D（啲）家長邏輯」。■香港文匯報記者 陳川
網民鬧爆愚婦
Kashu Li：個logic幾時由「有案例」變成「一打就癱」......
Manfred ToTo：同「凡係飲過水既（嘅）人都會死」有咩分別？
Edmond Kwok：有人癱，唔打＜──究竟有乜錯？／／有沙蟲，斬腳趾，有乜錯？
Corinne Tsoi：有人搭車俾車撞死，你以後唔好搭車；有人喺屋企有火災燒死，你以後唔好留喺屋企呀，笨！
Alan Wong：吾（唔）好帶小朋友打疫苗呀，到時害死自己小朋友吾（唔）好叫醫生醫呀，叻過醫學權威自己醫埋佢啦！
Kei Dionysius See：在衡量負面後果（風險）的可能性如遠低於其回報，則應該值得做。
Kate Lee：其實要多謝呢位媽媽，我特登google點解9歲就要打疫苗。
資料來源：fb留言 整理：香港文匯報記者 陳川