■陳國強大爆張秀賢做咖喱飯議員助理。 fb截圖反對派針對立法會補選搞嘅所謂「初選」，就好似潘朵拉盒子咁，一打開啲衰嘢就㩒都㩒唔住：呢邊廂輸咗補選嘅姚松炎仲係死咬「初選」搞手「民主動力」召集人趙家賢，嗰邊廂重返議會嘅「新民主同盟」咖喱飯（范國威），就俾仇家踢爆對「初選」手下敗將張秀賢「有所表示」，畀個議員助理佢做。
嘩！咁樣算唔算賄選，算唔算提供延後利益令對方唔會夾硬入閘同自己對撼呢？咖喱飯就聲稱只係計劃請張秀賢擔任「義務顧問」喎，有花生友覺得張秀賢份「筍工」咁就見光死。
有人就認為咖喱飯借刀殺人，因為事件曝光就可以大條道理走數唔請對方啦！
一直同咖喱飯有牙齒印、補選入唔到閘嘅沙田區議員陳國強，喺愚人節當日出咗個po（帖文），大爆新東「初選」敗陣嘅張秀賢做咗咖喱飯議員助理，又話呢樣嘢再次證明「初選」係一個局。
嗱，根據《選舉（舞弊及非法行為）條例》第七條，任何人提供利益畀另一人，作為佢參選或者唔參選嘅誘因或者報酬，就係喺選舉中作出舞弊行為，而根據第六條，作出舞弊行為者，如果循簡易程序審訊，一經定罪可被判罰款20萬蚊同監禁3年，如果循公訴程序審訊，一經定罪更可被判罰款50萬蚊同監禁7年。
有古惑 「冇受薪咪唔算賄囉」
雖然張秀賢簽咗「初選」備忘錄，承諾輸咗「初選」唔會入閘玩補選，但究竟佢同咖喱飯係咪好似陳國強所講咁有古惑，就好多人都議論紛紛。
茲事體大，加上陳國強出po當日正值愚人節，唔少傳媒都去搵兩個當事人叫佢哋解畫。
張秀賢話現時唔係咖喱飯嘅受薪議助，叫記者問咖喱飯好過，咖喱飯就話曾經與張秀賢商討請佢擔任「義務顧問」，但未有定論喎。
陳國強就寸咖喱飯對出力幫佢助選嘅張秀賢用完即棄；同樣係咖喱飯死對頭、喺補選中輸畀佢嘅西貢區議員「哪吒」方國珊，亦都唔執輸抽水，話事件正好反映「初選」只係「一場遊戲一份工」，咖喱飯先對張秀賢嚟一招安撫，用錢買佢嘅支持，之後透過「新同盟」啲兄弟放風畀陳國強借刀殺人，借事件曝光順理成章唔請對方，「認真你就傻豬豬。」
方國珊：初選只係場遊戲
哪吒仲叫選民以後唔好「含淚投票」㖭。
一直「關心」張秀賢畢業後生計嘅「無敵神駒」仇思達，就形容單嘢係見光死，叫做返無主孤魂嘅對方搵第二個老闆嚟黐！■香港文匯報記者 陳庭佳