■網民恥笑蟲炎係「佛系」參選區會，笑佢覺得咩都唔使做自然有人投。 網上圖片因為唔做地區工作，而喺立法會九龍西補選失敗後做咩好？蟲炎（姚松炎）就話畀大家聽，佢又要再度空降，再次挑戰民建聯立法會議員鄭泳舜，喺南昌北區選同佢死過。佢講到雄心壯志咁，唔等於已經上咗一次當嘅反對派支持者會再同佢癲，唔少人都話區議會更重視實幹，有人直接話佢嘥氣，仲有人問佢係咪輸到傻咗，上次投佢投到好似射咗張票落海咁嘅選民就話︰「 如果佢再嚟，我投白票！」 ■香港文匯報記者 甘瑜
《蘋果日報》喺愚人節嗰日出咗篇新聞，話蟲炎「積極考慮」去組團出選九龍西嘅區議會選舉喎，仲口響響咁話自己會考慮挑戰鄭泳舜所屬嘅南昌北，另外佢哋都會去挑戰民建聯主席李慧琼所屬嘅土瓜灣北、西九新動力梁美芬嘅黃埔東喎。
之不過，蟲炎唔係層次好唔同，唔接市民Case（個案），又唔點鍾意舊式落區㗎咩？蟲炎就喺篇報道入面解釋，所以佢哋係諗住組團出選，去為居民提供地區服務喎，咁係咪即係又唔係佢做呢？
選唔係咁重視地區工作嘅立法會都輸咗，點解選區議會反而有勝算呢？蟲炎話佢自己都有超過10萬個九西選民支持，希望「善用補選得票數據」，「增加其團隊的勝算」，輸咗鑊甘嘅仲講到自己好有價值咁，呢方面佢又真係有自己一套嘅。
網民諷唔使落區做等緣分到
佢就講咗自己點睇，咁網民點睇呢？客氣啲嘅回應係「Vanessa Lo」嘅「 區議員更貼地，今仗更難打。」
另一個演繹版本就係「Wong Lee」嘅「選區議會，仲要空降，係唔係輸到short（傻）咗？」
「Beyond Wong」直斥︰「膠即係膠，輸左（咗）一次，都知人地（哋）票源多過你，仲要人地（哋）在地區做左（咗）咁多年，你憑甚（什）麼輸完立法會可贏區議會？」有網民仲整咗張圖寸佢係「佛系社區工作者」，即係咩都唔做但覺得「緣分到」就有人投自己。
「投機零誠意 唔該早收檔」
唔少網民就同佢數返晒佢嘅問題。「Hugo Yeung」話︰「當年姚松炎攻置富選區，對手係『隱形左派』，屆屆自動當選，但姚生一攻輸左（咗）即刻走，都唔肯投資時間落個社區到（度），乜你真係覺得『姚松炎』三隻字就R（搲）到票？」
傷心選民「Bonebone Li」狠批︰「剛復（愎）自用！脫離現實！上次（九西補選）我早上7點半走去廣華隔離（籬）間小學投佢票，但佢真係夠膽一個助選團嘅人都無，更莫論單張同banner（橫額），連最基本嘅誠意都無，如果佢再嚟，我投白票！」
「Alex Chan」形容蟲炎做「政治投機者」；「SH Yung」叫佢「返去教書算啦」；「Sum Sum」就話︰「自量吓（下）啦，成日阻住啲位。」
「Ngan Sang Yeung」揶揄︰「輸多次正式收皮。」
「Rex Yau」亦問︰「April fools（愚人節笑話）？」