■懷疑阻礙同學投票者，被指為激進「本土派」分子。 視頻截圖傳統反對派同「港獨」分子爭權爭到去大學。參加浸大學生會選舉嘅「漣翊」，被質疑係有社民連同職工盟背景嘅「傀儡莊」，結果被校內嘅「獨派」分子追擊，搞到信任票不足而落選，令社民連等人忿忿不平，隨即向「港獨」分子開炮。近日，「漣翊」競選幹事長嘅黃雅文就接受「自己友」訪問，公然話支莊其實係支持「港獨」嘅，有莊員仲撐過「佔領語文中心」，結果投票當日就俾「獨派」搞，令佢「心裡面或多或少有啲陰影」喎。有人就直指「獨莊」係要霸住茅坑：「總之邊個唔聽『本土派』老鬼支笛，咪搞到佢地（哋）上唔到莊囉。」
「漣翊」因為同社民連及職工盟等關係密切，加上身為浸大宗教及哲學系高級講師嘅陳士齊，竟然私下用學生資料叫人投票，「獨派」就出手追擊呢個傀儡莊，包括搵人喺票站門外截停有意投票嘅同學，向他們喊話「漣翊」係「街工同社民連嘅成員，曾經喺『七一』嘅時候打過（前）中大學生會長（周竪峰）」，叫人千祈唔好投票。
是次選舉其後因投票人數未過10%的門檻而無效，「漣翊」向仲議會投訴，但仲議會以該名阻人投票者並無以武力等粗暴手段阻止其他同學投票，其投拆被駁回，令浸大斷莊。前「獨莊」會長劉子頎，就可以繼續也文也武，指點江山。
落選突撐「獨」 打倒昨日的我
「獨莊」搞到社民連、職工盟等人入侵校園嘅計劃落空，佢哋當然好唔忿氣。黃雅文近日接受傳媒訪問時就話，佢哋支持「港獨」，仲打倒昨日的我，話佢哋喺諮詢會話經過「自決公投」後，如果大部分港人支持「一國一制」，佢哋都會接受呢番話並非佢「真正立場」。
她稱，「我地（哋）都澄清，『民主自決』本身包含民主價值，人民有自行決定嘅權利，我哋唔接受用民主程序得到反民主嘅結果。我哋亦清楚講明，只要社會係平等自由民主，我哋都支持『香港獨立』。」
黃雅文又話佢同班莊員同政黨有聯繫，喺第一次諮詢會已「一早講咗」，又稱唯一嘅社民連成員亦承諾，如果當選就會「凍結會籍」，又話尊重其他同學呼籲唔好投佢哋，但「唔應該喺票站前騷擾想投票嘅同學......我以為當中嘅矛盾係可以化解，一致嘅目標係可以討論。唔少莊員以前未試過抗爭，都義不容辭拋開過往框框，一齊參與『佔領語文中心』。結果依然搞成咁。我心裡面或多或少有啲陰影，唔會再咁易信人。」
盲粉斥「獨」打壓異己
撐過劉子頎「佔領語文中心」、「香港眾志」嘅廖偉濂就轉發了有關報道，發文話，「我覺得最令人悲憤的是，仍然有許多失實、胡亂堆砌的標籤，甚至成為反對聲音的主軸。過去反對陣營內因政治理念不同，有嘗試多作思辯、再三討論，是健康、進步的體現。然後，今日卻又回到了原點。也許，是我太天真了。」
職工盟屬下清潔服務業職工會組織幹事杜振豪也發帖批評「獨派」：「隱瞞政治背景？假既（嘅）。社民連莊？屈既（嘅）。支持『一國一制』？又係屈既（嘅）。總之邊個唔聽『本土派』老鬼支笛，咪搞到佢地（哋）上唔到莊囉。校政冇人跟小事啦，霸住個茅廁先係大事。」
其實，政治唔應該入侵校園，無論係社民連傀儡莊，或者「獨派」上咗莊都唔係一件好事，現在佢哋因一次選舉就狗咬狗骨，為大家提供源源不絕嘅花生，都算係一件樂事。■香港文匯報記者 陳川