街工議員白頭佬（梁耀忠）想解僱勞工組3個職員一事，隨住錄音流出繼續發酵。除咗職員之一嘅譚亮英前日打上網台節目質疑白頭佬其實係想排除異己之外，另一個危危乎嘅王曉君噚日亦喺facebook發帖，認同譚亮英嘅講法話︰「參選係為咩呀？我哋根本就唔相信精英政治，唔覺得一兩個人喺立法會入面可以改變到工人既（嘅）命運。參選係攞資源去壯大勞工組織，相信集體既（嘅）力量，而唔係個議員可以凌駕個組織！」不過白頭佬呢幾日就潛水冇再講呢件事囉。
早排不斷「澄清」自己無炒人，但日前就有白頭佬喺街工開會時嘅發言錄音流出，內容證實佢確實講過「有啲同事人工，我到5月31日係難以負擔」、「唔出人工，咁係咪大家可以做義工呢？」、「冇話解僱人，冇話解散勞工組，我只係話我唔夠錢去承擔」、「如果有捐款咪出糧囉」等無良語錄。
「做議員義工佢點諗？」
繼facebook專頁「佔領中環」之前借事件數返白頭佬「舊史」，話佢唔敢坐立法會主席個位，令同路議員「俾人㩒住打」後，反對派嘅評論員李慧玲前日亦喺網台節目度大講件事，質疑白頭佬連「唔出糧可以做義工」咁侮辱嘅說話都講得出，「試吓（特區）政府同你講唔出議員人工畀你，但唔係DQ你㗎，你可以返嚟做議員義工㗎，睇吓佢點諗？」
苦主之一嘅譚亮英亦有打上節目大數白頭佬幾咁無良，仲話明明白頭佬係立法會同區議會議員，佢所有助理嘅人工都可以向立法會同區議會報銷，唔明點解佢同另外兩名苦主會因為「財赤」而無糧出，質疑白頭佬係咪因為唔鍾意勞工組3人嘅做事方法，搵借口「炒」咗佢哋。
本身有唔妥 錄音露玄機
公道講句，譚亮英同時係工黨副主席，但就唔係街工會員而只係職員，咁有派系問題都唔出奇嘅。再加上前日流出嘅錄音，白頭佬都鬼拍後尾枕咁話自己「揀」嗰3個人，唔係針對佢哋喎，仲話自己從來冇過問佢哋做緊乜，但同時補多句「佢哋都冇向執委會交代自己做緊乜」，有冇唔妥，應該都幾清楚啦。
之不過，就算係養狗咬蘿柚，「棄養」嗰吓都要跟規矩㗎。網民「Henry Ching」揶揄白頭佬「路遙知馬力，講錢見人心。」
「林顯」就籲白頭佬易地而處，「老板（闆）無錢可以炒人，但唔可以不炒人，唔俾（畀）人另謀高就而係叫人做義工。」
呢3個職員使唔使炒就唔知，不過喺今屆立法會已經係一人黨嘅街工，又內亂又俾同道圍攻，睇嚟下屆滅黨都似。 ■香港文匯報記者 鄭治祖