■譚文豪聲稱自己乜都無做過，但實情唔係咁喎。 民建聯fb短片截圖公民黨立法會議員譚文豪之前因為爆咗一句馬首是「膽」，俾人叫咗做「馬膽豪」，但睇怕今次佢又多一個花名叫「金魚豪」！話說日前「一地兩檢」條例草案委員會最後一次會議上，佢俾委員會主席葉劉淑儀趕咗出去，之後仲一臉冤枉咁話自己「無做任何動作」，不滿葉太趕佢出去喎。正所謂有片有真相，民建聯就用當日嘅新聞片同大家嚟個案件重演，見到當時譚文豪又嗌又衝出去主席台前，呢鑊斷正啦啩？
譚文豪當日扑咪時話自己「無做任何動作，無嗌，甚至乎無舉手」，講到自己無端端俾人趕出會議廳咁，但事出必有因，點解佢會俾葉太趕出去呢？民建聯嘅案件重演就解答得一清二楚：原來譚文豪當日喺會議室入面，就好似漆黑中嘅螢火蟲一樣咁鮮明、咁出眾，又舉手又大叫葉太「無賴」，之後仲衝埋出去主席台前同葉太「理論」，難怪俾人趕啦！
網民亦都睇唔過眼佢擘大眼講大話，「Cheung Hin Chung」話「金魚豪」好似丁蟹上身咁死撐「我無錯」，「Joseph Lung」就唔滿意佢影衰晒啲機師，「Rick To」更加質疑成個反對派都有「選擇性失憶」，要醫醫佢咁話！ ■香港文匯報記者 陳庭佳