■傻根玩「復播」，神駒就覺得係「熱青城」分裂。 仇思達fb截圖「青城派國師」傻根（陳云根）呢期好似無乜聲氣，喺《熱血時報》個節目更加係無晒noise（迴響）。早幾日佢開返封咗塵差唔多兩年嘅YouTube（YT）頻道，話係「城邦電台」復播喎，但更多花生友就覺得佢係學「狗主」黃毓民咁「叛變」嘞，有人仲留意到《熱時》3月開始就無再喺佢節目度顯示「即時課金」數字，同佢啱啱過底時嘅大鑼大鼓、吹捧佢一晚收九餅嘢好大出入！不過，即使係繼續顯示「即時課金」數字嘅《熱時》所謂皇牌節目，都係成晚一個仙都無收到。呢啲係咪就係「因利而聚，利盡而散」呢？
傻根早幾日用返佢個「城邦電台」上載咗兩條「時事短評」，但其實都係借頭借路鬧吓呢樣鬧吓嗰樣咁。唔知係咪太耐無咁樣做節目呢，佢喺第一集顯得唔係好習慣，不停眨眼，之後就解釋係「燈光強烈」。
不過，第一集喺今個月6號上載以嚟，都係得1,700幾人次睇過，同佢過底《熱時》初期報稱有萬九人收睇佢節目相距甚遠，前日上載嘅第二集更加慘淡，得3位數嘅九百幾個！
仇思達譏利窮則散
近排集中火力向「長毛」梁國雄開火嘅「無敵神駒」仇思達，亦都注意到傻根有異動：「『熱青城』分裂了！聲稱擁有『萬九收視、九萬課金』的陳云根，竟然自立門戶，復辦所謂『城邦電台』，自行吸金，唔益阿丐達（『熱狗』前頭目黃洋達）。利窮則散，老屍又中！」
神駒啲「益友」亦都覺得今次係「陳云根叛變」，當然唔少得搬返「熱狗」啲奇人異事出嚟恥笑吓，有人抽《熱時》篤數呢條水，其中「Ying Ho Wong」話傻根將啲片擺喺YouTube播，即係唔畀面堅持唔用YouTube播《熱時》節目嘅殘獸胃（黃洋達妻陳秀慧），「Briar Rose」就話如果真係有九餅嘢課金，打死佢都唔走喎。
「Endrew Cheung E」就發現傻根喺《熱時》個《縱橫漢天下》節目，最後一次有顯示「即時課金」數字係喺3月17日嗰集，當日只係收到兩嚿水，之後集數全部冇顯示有幾多「即時課金」，覺得有景轟，有益友就估計課金數字低到唔想畀人知先至咁做。
「皇牌節目」斗零都無
不過，我哋摷返仲有顯示「即時課金」數字嘅《熱時》節目，數字就更加慘不忍睹，好似《大香港早晨》，噚日朝早3條友講咗兩粒鐘，「即時課金」都係得一嚿水，每條友平均時薪仲少過最低工資。另一「皇牌」《熱血政治》仲慘，噚晚一個仙都無收到，sosad！
之但係，可能對於「熱狗」嚟講，呢啲數字都係幻覺嚟嘅啫，嚇佢哋唔到嘅，篤夠佢咪得囉！ ■香港文匯報記者 陳庭佳