■黃家華整兩張櫈惹嚟唔少劣評。fb圖片即係咁，身為一個區議員，真係應該貼地少少，真正了解居民需要先至好去建議起一啲地區設施，如果唔係就會好似公民黨荃灣區議員黃家華咁俾人笑到面黃！話說佢老哥大力推動、位於荃灣悅來酒店對開行人路嘅座椅日前啟用，不過就劣評如潮，俾當區街坊狂炳又阻街又背向馬路，無事時係一張「人肉吸塵座」，有事起上嚟就會變成「優先座」，優先送院嗰隻！
呢個「世界級」建設係黃家華喺荃灣區議會上年度嘅小型環境改善工程項目中建議嘅，呢兩張櫈同佢另一個整櫈建議合併招標，兩個項目招標後費用夾埋要四皮嘢，平均除開嚟計，即係一張櫈要成皮嘢。
坐正馬路邊 又曬又危險
數字話多唔多話少唔少，但附近街坊就覺得同射咗落海無乜分別，因為設計同位置真係差到得人驚，有人不滿兩張櫈令到條行人路窄上加窄，加上前面就係小巴站，會阻住人等車；有人就提到要坐嘅可以去隔籬公園舒舒服服咁坐，而兩張櫈都無瓦遮頭，「個位曬到應一應，坐上去一定勁熱」，更加有街坊指出條馬路一向多車，坐喺度同做「人肉吸塵機」無乜分別。
有網民更加睇穿呢個係致命設計，「Kee Wah」話：「仲背住馬路，有車鏟上嚟冇得走！一鑊熟！」「Roger Lui」就覺得咁樣好閒啫：「攻（公）民黨不嬲都係推市民去死。」
垃圾建議推畀隔籬選區
黃家華本身個選區喺梨木樹邨，落到嚟熊貓酒店整壇咁嘅「傑作」，「Fifi Angela」就話：「佢明明唔係嗰區，踩過界喎！仲要將啲垃圾建議推去隔籬區，超賤！」本身係當區區議員嘅民建聯立法會議員陳恒鑌亦都馬騮掩眼：「唉！越俎代庖的結果。」 ■香港文匯報記者 陳庭佳