■一班人喺黃雨下嬉水，害己害人。網上圖片颱風期間遠離溪澗是常識吧，更何況黃雨警告下到山洪暴發的黑點--大城石澗嬉水，直情係玩命啦。有網站前日上載一批照片，顯示一班人喺2018第一個一號風球加黃雨警告中挑戰大城石澗，並揶揄他們「不怕惡劣天氣，亦不怕山洪暴發，完全係勇者無懼」。唔少網民批評，話佢哋一旦出意外，除咗害自己，分分鐘害埋救佢哋嘅人，實在係自私無極限。
大城石澗位於城門水塘北端，源於香港最高的大帽山，係香港最大嘅石澗。即使天朗氣清，石澗水源也非常充沛，一旦遇上大雨，隨時山洪暴發，單單在1995年，就有4人在此遇上山洪而送命。
帶隊闖石澗 「神人」曾需救援
天文台前日發出一號風球並發出黃雨警告，近日新開的facebook專頁《山野龍咁威》，就上載咗一班男女喺黃雨警告時，在大城石澗「玩水」的情況，相中只見當時水流極洶湧，但一班人嬉皮笑臉喺大水中爬嚟爬去、擒高擒低影相，真係睇嗰個都覺得牙煙，發文者都寸佢哋「勇者無懼」。
佢仲揶揄：「上次圖中一位神人，扒艇反艇爬唔返上艇，喺大海漂流幾個鐘，動用到水警救援，今日仍不畏危險，帶隊勇闖大城石澗，我山野龍咁威都冇佢咁威！」
「出事又要救」 「應票控罰錢」
唔少網民留言鬧爆呢批行山友。「Wing Yuen Kwong」道：「係人都知落大雨山澗好（可）能會山洪暴發，到出左（咗）事又要消防去救你，汝（與）其係咁點解唔等天氣好轉先去呢？」「Murphy Shin」就狠道：「唔該唔好害啲消防員同民安隊員！他們一點都不值得為你這班白痴而賠上寶貴的生命。」
「The Chans」就建議：「可唔可以提議警務處訂立規條，如有違規，發告票。就算遇到危險救得番（返）都要罰錢，救唔番（返），由家人代交罰款。」「Mickey Leung」亦話：「（一旦有意外）動用大量人力物力去救佢哋，救完佢哋開返條單就啱喇！」 ■香港文匯報記者 陳川