■何君堯在fb發文反駁曾俊華謬論。 fb截圖曾聲稱「不理政事」嘅鬍鬚曾（曾俊華）日前出席一個論壇時，先諷刺話要保留香港特色，未必要好似前特首梁振英（CY）咁「穿華服扮古人」，然後又暗寸立法會議員何君堯早前喺立法會會議上做網上直播嘅行為「幼稚」。何君堯噚日就喺facebook以《心黃盡露還是懵上心頭》為題，質疑鬍鬚曾曾經都寫文鬧過反對派「盡情破壞」香港，但𠵱家再講到破壞規矩時，竟然唔係講反對派強搶手機、衝擊立法會等問題，而係去針對CY同自己，「如果他不是誇張，就肯定是有問題了！」
借題暗諷CY何君堯
鬍鬚曾日前以嘉賓身份，出席反對派陣營「公民實踐培育基金」舉辦嘅論壇，發言期間講到如何保留香港特色時，就乘機攞CY嚟「開玩笑」，話「雖然未必個個像CY（梁振英），懷舊到要穿華服，扮古人」，然後又引用歌詞「懷緬過去常陶醉，一半樂事，一半令人流淚」，再借題發揮話CY治下「係流淚定係樂事，大家嘅答案應該差唔多」喎。
踩完CY又再踩下反對派其他敵人。鬍鬚曾講議會秩序時話，自己1982年返到香港，先後做過公務員同問責官員，當時嘅議會好有效率、係紳士淑女議事嘅地方喎。他又話，當時大家都講道理，尊重議會規矩和慣例，「唔會打交、唔會開facebook live、做鬼臉，直頭好似pre-school（幼稚園）一樣。」
何君堯：慶幸他當不了特首
講破壞議會規矩，唔講衝擊、唔講搶嘢，反而怪建制派，會唔會怪咗啲？何君堯噚日喺facebook反駁，指鬍鬚曾喺論壇上批評香港有啲政客破壞制度與規矩，「聽起來大家還以為他正在批評那些行為不檢的議員，如許智峯搶手機、陳志全衝擊立法會或擾亂議會、陳淑莊濫用程序提出終止待續動議、以及其他『泛統』濫點法定人數、企圖製造流會等等諸士。噢！甚麼也不是！原來他指的是CY和我！」
何君堯揶揄，自己俾鬍鬚曾不點名「批評」，「真有點受寵若驚」，「竟然在鬍鬚曾眼裡，何君堯在立法會內與記者一起扮演第四公權，拍攝『泛統』搗亂議會過程，向公眾揭示『泛統』的醜態，就是『幼稚的行動』，我心諗，如果他不是誇張，就肯定是有問題了！」
何君堯仲指出，鬍鬚曾當年做財爺嘅時候，都批評過嗰班「泛統」議員係「盡情破壞」香港嘅人，「如今他卻反唇相稽批評那些撥亂反正的人是破壞者！不禁令人懷疑，究竟是他變得糊塗，還是他本質就是如此呢？無論怎樣，我們慶幸他當不了特首，否則香港的穩定繁榮危矣！」 ■香港文匯報記者 鄭治祖